काठमाडाैँ - प्रतिनिधिसभाको शिक्षा, स्वास्थ्य तथा सूचना प्रविधि समितिले विद्यालय शिक्षा विधेयक (असार १३) संसदमा पेस गर्ने तयारी गरेको छ।
बुधबार दिनभर पनि विधेयकको विवादित विषयमा सहमति जुटाउन परामर्श समन्वय उपसमितिको बैठक बसेको थियाे। उक्त समितिले विवादित विषयलाई साँघुरो बनाउँदै लगेको जनाएको छ।जसका लागि बिहिबार समितिको बैठक बोलाइएको छ। ‘सकेसम्म बिहिबार नभए शुक्रबार समितिबाट विधेक पास गर्छौं,’ सभापति अम्मर बहादुर थापाले भने।
केही विषयमा टुंगो लाग्न बाँकी छ। बिहीबार बिहान ८ बजे समन्वय उपसमितिको बैठक बोलाइएको छ। शिक्षा समितिका अनुसार, उपसमितिले मिल्न बाँकी विषय मिलाएर दिउँसो १ बजे समितिको बैठकमा लैजाने तयारी छ।
समिति सदस्यहरूको एक मत भएमा अब छलफल धेरै विषय बाँकी छैनन्। ‘पर्सी(असार १३)सम्म पास गर्ने विषयमा माननीयहरूमा पनि भर पर्छ,’ सभापति थापाले भने।अब समितिबाट पास भएपछि यो विधेयक प्रतिनिधिसभामा जान्छ। प्रतिनिधिसभाले छलफल गरेर पास गर्छ ।
त्यसपछि राष्ट्रिय सभामा जान्छ। राष्ट्रिय सभामा पनि प्रतिनिधिसभामा जस्तै संसदीय प्रकिया पूरा गरेर अगाडि बढ्छ।राष्ट्रिय सभाबाट पास भएपछि पुन: प्रतिनिधिसभामा आउँछ।राष्ट्रिय सभाले गरेको संशोधन प्रतिनिधिसभाले स्वीकार गरेको खण्डमा सभामुख हुँदै राष्ट्रपतिकहाँ पुग्छ।
राष्ट्रपतिले प्रमाणीकरण गरेपछि विधेयक ऐनमा रुपान्तरित हुन्छ।निजी विद्यालयको व्यवस्थापन र सञ्चालन, ईसीडी र शिक्षकका माग मुद्दा बढी पेचिलो बनेको थियो।
गत वैशाख १७ गते शिक्षक महासंघसँग १५ असारभित्र ऐन जारी गर्ने सहमति भएको थियो। ऐन माग गर्दै शिक्षकहरूले चैत २० देखि २९ दिनसम्म शैक्षिक हड्ताल गरेर आन्दोलन गरेका थिए।
