बर्दघाटका सामुदायिक विद्यालयहरूमा ‘एक विद्यालय, एक नर्स कार्यक्रम’ प्रभावकारी बन्दै

विद्यालय

गृहपृष्ठ
विद्यालय

बर्दघाटका सामुदायिक विद्यालयहरूमा ‘एक विद्यालय, एक नर्स कार्यक्रम’ प्रभावकारी बन्दै

ईडीयू सवाल आइतबार, साउन १८, २०८२

काठमाडाैँ - पश्चिम नवलपरासीको बर्दघाट नगरपालिकाका सामुदायिक विद्यालयहरूमा सञ्चालित ‘एक विद्यालय, एक नर्स कार्यक्रम’ प्रभावकारी बन्दै गएको छ। यस कार्यक्रमले विद्यार्थी र अभिभावक दुवैलाई राहत दिएको छ।

विद्यालयमा नै सामान्य ज्वरो, रुघाखोकी, पेट दुखेको वा सानो चोटपटक लागेका विद्यार्थीहरूको उपचार हुने र गम्भीर अवस्थाका विद्यार्थीहरूलाई भने अभिभावकलाई खबर गरेर अस्पताल पठाइने गरेकाे विद्यालय जनाएकाे छ।

नगरप्रमुख शम्भुलाल श्रेष्ठका अनुसार, नर्सहरूले औषधोपचारसँगै विद्यार्थीहरूलाई भावनात्मक सहयोग पनि प्रदान गर्छन्। यसले अभिभावकहरूलाई आफ्ना बालबालिका विद्यालयमा सुरक्षित छन् भन्ने विश्वास दिलाएको छ।नर्सको व्यवस्था भएपछि छात्राहरूले आफ्ना स्वास्थ्य समस्याहरू खुलेर राख्न पाएका छन्। विद्यालयमै सेनेटरी प्याड उपलब्ध हुनु र आराम गर्ने छुट्टै कोठाको व्यवस्थाले महिनावारीको समयमा विद्यालय नआउने समस्या कम हुने विश्वास गरिएको छ। उपचारका अतिरिक्त, नर्सहरूले विद्यार्थीहरूलाई रोग लाग्नबाट कसरी बच्ने भन्ने बारे पनि जानकारी दिन्छन्।

बर्दघाट नगरपालिका - ५ मा रहेको शान्ति निकुन्ज माविका प्रधानाध्यापक विनोद खनालले विद्यालयमा नर्सको व्यवस्था भएसँगै विद्यार्थीलाई धेरै सजिलो भएको बताए। आवश्यक परेको बेलामा अन्य समयमा पनि विद्यार्थीको स्वास्थ्य अवस्थाबारे जानकारी लिने काम हुँदै आएको छ। विद्यार्थीहरुलाई सरसफाई र स्वास्थ्यका बारेमा समेत विद्यालय नर्स मार्फत जानकारी दिँदै आइएको खनालले बताए।

यसले विद्यार्थीहरूमा स्वास्थ्य सचेतना बढाउन मद्दत गरेको छ। हाल, मावि तहका विद्यालयहरूमा १५-१५ दिनमा नर्सहरूलाई पठाइन्छ। स्थानीय स्रोतबाट दुई जना नर्सहरूको व्यवस्थापन गरिएको छ र थप एक जना नर्सको माग गरिएको छ। स्थानीय स्रोतबाट दुई वटा नर्स व्यवस्थापन गरिएको बर्दघाट नगरपालिकाका प्रमुख प्रशासकीय अधिकृत प्रकाश खनालले जानकारी दिए। यस कार्यक्रमले विद्यार्थीहरूलाई स्वास्थ्य सेवामा पहुँच पुर्याउनुका साथै उनीहरूको नियमित विद्यालय आगमन र सरसफाइमा पनि सकारात्मक प्रभाव पारेको छ।

प्रकाशित मिति: आइतबार, साउन १८, २०८२ १०:४४