काठमाडाैँ - शिक्षा विज्ञान तथा प्रविधिमन्त्री रघुजी पन्तले शिक्षा विधेयक नलब्याइ विधेयक छिटो पास गर्न आग्रह गरेका छन्। उनले नयाँ-नयाँ विषय ल्याउने र थप्दै गर्याे भने विधेयक पास नहुने बताउदैँ छिटो पास गर्न आग्रह गरेका हुन्।
'म हात जोडेर भन्छु विधेयक छिटो पारित गरौँ। विधेयकलाई पूर्ण गर्न नलागौँ। यो कहिल्यै पूरा हुँदैन। नयाँ नयाँ विषय ल्याउने र थप्दै जाने हो भने विधेयक कहिल्यै पास हुँदैन। त्यसैले विधेयक नलब्याऊ,' उनले भने।
उनले विधेयक छिटो पास गर्न आग्रह गरे। 'मान्छे बाहिर आजित भइसके। सबै माननीयज्यूहरूलाई हात जोडेर आग्रह गर्न चाहन्छु अब छिटो विधेयक पास गरौँ,' उनले भने।
विद्यालय शिक्षा विधेयकका नमिलेका विषयबारे उपसमितिले तयार पारेको प्रतिवेदन आज पेस गरिएको छ। साथै पन्तले शिक्षा विधेयक प्रतिवेदन अध्ययनका लागि दुई दिनको समय दिन प्रस्ताव गरेका छन्।
पूर्ण छात्रवृत्तिको विषय मूल कानुनमा नभई नियमावलीमा राख्न उचित हुने मन्त्री पन्तको भनाइ छ। विधेयकबारे एमालेका सांसद छविलाल विश्वकर्मा नेतृत्वको उपसमितिले तयार पारेको प्रतिवेदनमा पूर्ण छात्रवृत्ति भन्नाले शिक्षण शुल्क, परीक्षा शुल्क, पाठ्यपुस्तक तथा शिक्षा सामग्री, पोसाक, यातायात, आवासीय सुविधा (विद्यालयमा उपलब्ध भएमा) लगायत विद्यालयले लिने शुल्क तथा उपलब्ध गराउने सुविधा भनिएको छ।
मन्त्री पन्तले सामुदायिक, गुठी तथा निजी विद्यालयलाई संरक्षण र नियमन गर्ने सरकारको दायित्व भएपनि निजी विद्यालयको घाँटी अठ्याउने गरी कानुन बनाउन नहुने धारणा राखेका हुन्। उनले निजी विद्यालयलाई नियमन गर्न सरकार प्रतिवद्ध रहेको बताए।
‘मेरो अहिले पनि आग्रह के छ भने पूर्ण छात्रवृत्तिमा आवासको सुविधा कानुनमा भन्दा नियमावलीमा व्यवस्था गर्दा राम्रो हुन्छ। नियमावलीमा राख्दा भोलिको दिनमा व्यवस्थापन गर्दा राम्रो हुन्छ भन्ने आग्रह गर्न चाहन्छु। कानुनमै राख्दा त्यसको कार्यान्वयन र प्रगतिशील हुनुपर्छ। हाम्रो संविधानले तीन खम्बे अर्थ नीति लिएको छ। हाम्रो कानुनले गुठिमार्फत सञ्चालन भइरहेका, निजी र सामुदायिक विद्यालयको परिकल्पना गरेको छ,' मन्त्री पन्तले भने, 'तीन प्रकारका विद्यालयबारे सरकारले आफ्नो भूमिका गर्नुपर्छ। छात्रवृत्तिप्रति सरकार प्रतिबद्ध छ। निजी विद्यालय नियमन गर्न सरकार प्रतिवद्ध भएपनि निजी विद्यालयको घाँटी अठ्याउने काम गर्नुहुँदैन। त्यसकारण पूर्ण छात्रवृत्तिको लागि आवासको सुविधा नियमावलीमा समावेश गर्नेगरी जान आग्रह गर्नुपर्छ।’
