शिक्षा मन्त्रालयको काम केशरमहलबाट सञ्चालन ‍हुने

समाचार

गृहपृष्ठ
समाचार

शिक्षा मन्त्रालयको काम केशरमहलबाट सञ्चालन ‍हुने

ईडीयू सवाल आइतबार, भदौ २९, २०८२

काठमाडाैँ - शिक्षा, विज्ञान तथा प्रविधि मन्त्रालयको काम केही समय केशरमहलबाट सञ्चालन हुने भएको छ। ‘जेनजी’ समूहको आन्दोलनबाट मन्त्रालयको भौतिक संरचनामा ठुलो क्षति भएपछि केही समयका लागि केशरमहलबाट मन्त्रालयका सेवा सम्पादन हुने मन्त्रालयका सचिव चुडामणि पौडेलले जानकारी दिए।

केशरमहलमा हाल केशर पुस्तकालय र सार्वजनिक खरिद तथा अनुगमन कार्यालय रहेका छन्। ती दुवै कार्यालयलाई खुम्च्याएर मन्त्रालयको काम पनि त्यहीँबाट नियमित सञ्चालन गर्न लागिएको हो। २०७२ सालको भूकम्पमा क्षति भएको केशरमहल भर्खरै मात्रै निर्माण सम्पन्न भएको हो। उक्त मन्त्रालय सिंहदरबारमा सर्नुअघि पनि केशरमहलमै थियो।

शुक्रबार मुख्य सचिव एकनारायण अर्याल नेतृत्वको टोलीले मन्त्रालयको अवलोकन गरेको थियो। सचिव पौडेलका अनुसार मन्त्रालयमा भौतिक संरचनामा क्षति पुगे पनि कागजपत्र भने सुरक्षित छन्। भूमिस्थ पार्किङमा राखिएका सवारीसाधन पनि जलेर ध्वस्त भए। माथिल्लो तलामा भने तोडफोड मात्रै भएको छ। आगलागीको प्रभाव देखिएको छैन। मन्त्रालयले वैदेशिक अध्ययन अनुमतिपत्र प्रदानलगायत अनलाइनबाट प्रदान गरिने सेवा भने नियमित रहेको जनाएको छ।

प्रकाशित मिति: आइतबार, भदौ २९, २०८२ ११:४२