काठमाडाैँ - नेपाल शैक्षिक परामर्श संघ (इक्यान) को २९ औँ स्थापना दिवस कार्यक्रम सम्पन्न भएको छ। इक्यानले २८औँ वार्षिकोत्सव मनाउँदै २९औँ वर्षमा प्रवेश गरेको छ। शुक्रबार काठमाडौँ र्यायाडिसन हाेटलमा उक्त कार्यक्रम सम्पन्न भएकाे हाे।
उच्च शिक्षाका लागि विदेश अध्ययन गर्न चाहने विद्यार्थीहरूलाई विश्वसनीय र गुणस्तरीय परामर्श सेवा प्रदान गर्दै आइरहेका शैक्षिक कन्सल्टेन्सीहरूको छाता संगठनका रूपमा इक्यानले विगत २८ वर्षदेखि महत्वपूर्ण भूमिका निर्वाह गर्दै आएको छ। यस २९ औँ स्थापना दिवसमा प्रमुख अतिथिकाे रुपमा सञ्चार तथा सूचना प्रविधिमन्त्री पृथ्वी सुब्बा गुरुङ र विशेष अतिथिमा गृह मन्त्रालयका सचिव गोकर्णमणि दुवाडी रहेका थिए।
कार्यक्रममा बाेल्दैँ सञ्चार तथा सूचना प्रविधिमन्त्री गुरुङले शिक्षालाई सुधार गरेर देश विकास गर्न संभव रहेकाे बताए। उनले नेपाललाई एजुकेशन हबको रुपमा विकास गर्न सकिने तर कसरी गुणस्तरीय बनाउने भन्ने विषयमा कसैलाई चासो नभएकाे बताए। उनले भने,' शिक्षालाई कसरी गुणस्तरीय बनाउने भन्ने विषयमा कसैलाई चासो छैन। अब समृद्ध नेपाल बनाउने लडाइँ हो। गुण गभर्नेन्स कुरा महत्त्वपूर्ण छ। राज्य कमजोर भएको छ। मुलुक लाजमर्दो स्थितिबाट चलेको छ। पूरानो संरचना भत्काएर नयाँ संरचना बनमउन सकियो भने मात्र समृद्धि संभव छ। ऐन नबन्दा देशले विकासको गति लिन सकेको छैन। '
साथै उनले इमानदार नेता र अनुशासित नागरिकको पहलबाट देश विकासमा जुट्नुपर्ने आवश्यकता औँल्याए। विकासका लागि सुशासन र समृद्धिका पक्षमा आफूहरु रहेको भन्दै उनले उच्च शिक्षाका लागि विद्यार्थीहरु विदेश जानु ठिक भएपनि युवालाई विदेश पठाउने मात्रै होइन स्वदेश फर्काउने अभियान पनि ल्याउन इक्यानलाई आग्रह गरे।
कार्यक्रममा विशेष अतिथिका रुपमा रहेका सचिव दुवाडीले स्वदेशमा युवाको उत्साह मर्न नदिन सबै लाग्नुपर्ने बताए। उनले शैक्षिक परामर्श व्यवसायीहरुमाथि आशंका व्यक्त गर्दै अहिले वातावरण धुमिल रहेको भन्दै पारदर्शी बनाउन आग्रह गरे। उनले भने,' कानुनलाइ उच्च मानेर सबैले दर्ता गरी सञ्चालन गर्नुपर्छ। सबैले अनुभुत गर्ने राम्रो सेवा दिनुपर्दछ। अरुले गर नगर भन्दापनि आफैंले जानेर यस क्षेत्रलाई शुद्धिकरण गर्न आवश्यक छ। '
त्यस्तै नेपाल शैक्षिक परामर्श व्यवसायी महासंघका अध्यक्ष एवं नेपाल शैक्षिक परामर्श व्यवसायी संघ (इक्यान) का पूर्व अध्यक्ष राजेन्द्र बरालले यस क्षेत्र व्यावसायिक रुपमा अगाडि बढिरहेको बताए। अध्यक्ष बरालले २९ वर्ष अगाडिका दिन सम्झँदै यो पेशालाई भरपर्दो र मर्यादित बनाउन एकताबद्ध भएर अगाडि बढ्नुपर्ने आवश्यकता रहेकाे बताए। साथै उनले यो क्षेत्रलाई बद्नाम गर्नेहरुप्रति खबरदारी गर्नुपर्ने भन्दै गैरकानुनी परामर्श सेवा दिनेलाई कारबाही गरेर व्यवसायलाई मर्यादित बनाउनुपर्ने र सम्मानित बनाउनुपर्ने धारणा राखे। बरालले अब विदेशी विद्यार्थी नेपालमा ल्याएर पढाउन आफूहरु तयार रहेको भन्दै वातावरण बनाइदिन सरकारसँग आग्रह गरे।
इक्यानका बर्तमान अध्यक्ष शेषराज भट्टराईले विश्वभर नेपाली विद्यार्थीले प्रतिस्पर्धा गर्न सक्ने हैसियत बनाउनु र नवीन कार्यमा प्रतिष्ठित हुँदै जानु इक्यानको आजको सफलता भएको बताए। उनले इक्यानकाे सफलतालाइ सरकारले सकारात्मक रूपमा लिनुपर्ने बताए।
'नेपालका विद्यार्थीहरुको इनोभेसन र जुन तरिकाबाट नेपालका विद्यार्थीहरु ग्लोबल कम्पिटेन्ट बन्नको लागि क्षमता राखिरहेका छन् यसले नेपाल सरकार र नेपाल सरकारका सरोकारवाला निकायले हामीप्रति प्राउड फिल गर्ने बेला आएको छ।’ उनले भने,‘ इक्यानमा आबद्ध साथीहरूको कारणले गर्दाखेरि आज विश्वमा नेपाली विद्यार्थीहरु ग्लोबल कम्पिटेन्ट मात्र गर्दैनन् यो देशको लागि एउटा शक्तिको रुपमा अगाडि बढेका छन्। यो गौरवको विषय हो। त्यसैले सरकारले धेरै आशंका गर्नुपर्दैन।’
अन्य निजी क्षेत्रका प्रतिनिधि एवं अन्य वक्ताहरुले इक्यानको आगामी सफलताको शुभकामना व्यक्त गर्दै इक्यानको योगदानको प्रशंशा गरेका थिए।इक्यानमा हाल ७ सय ७ जना सदस्यहरु आबद्ध छन्।
