साउनको तेस्रो साता कक्षा १२ को नतिजा प्रकाशन गर्ने बाेर्डकाे तयारी

नतिजा

गृहपृष्ठ
नतिजा

साउनको तेस्रो साता कक्षा १२ को नतिजा प्रकाशन गर्ने बाेर्डकाे तयारी

ईडीयू सवाल बिहीबार, साउन ३, २०८१

काठमाडाैँ - राष्ट्रिय परीक्षा बोर्डले कक्षा १२ को परीक्षाफल वर्षिक कार्यतालिका अनुसार नै सार्वजनिक गर्ने तयारी गरेको छ। बोर्डले अहिले उत्तरपुस्तिका परीक्षणको कार्य सकेर पुन: परीक्षण तथा रुजु र डेटा इन्ट्रीको काम सुरु गर्न थालेको छ।

बोर्डका अध्यक्ष डा.महाश्रम शर्माका अनुसार प्राविधिक कठिनाइ नआएमा कार्यतालिका अनुसार साउनको तेस्रो साता नै नतिजा सार्वजनिक हुनेछ।

गएकाे वैशाख १४ देखि २४ गतेसम्म सञ्चालन भएको कक्षा १२ काे परीक्षामा ५ हजार ५४२ विद्यालयका ४ लाख ९१ हजार ४९७ जना विद्यार्थी सहभागी भएका थिए। जापानको एक परीक्षा केन्द्र सहित १ हजार ५ सय २६ वटा परीक्षा केन्द्रमा परीक्षा सञ्चालन गरिएको थियो।

यो वर्ष पहिलो पटक बोर्डले स्वचालित छनोट प्रणालीको प्रयोग गरी परीक्षा केन्द्र निर्धारण गरेको छ। शिक्षा, विज्ञान तथा प्रविधि मन्त्रालय र बोर्डको प्राविधिक टोलीले पाइलट प्रोजेक्ट को रूपमा एक सफ्टवेयर बनाई पहिलो पटक काठमाडौँ जिल्लाका परीक्षा केन्द्र स्वचालित (र्याण्डम) विधिबाट छानिएको हो।

कक्षा १२ को नतिजा लेटर ग्रेडिङ निर्देशिका २०७८ अनुसार नतिजा प्रकाशन हुने अध्यक्ष शर्माले बताए। प्रत्येक विषयमा सैद्धान्तिकतर्फ कम्तीमा ३५ प्रतिशत अंक नल्याउने विद्यार्थी फेल हुनेछन्। कक्षा १० मा यो वर्ष बाट लागु भएको निर्देशिका कक्षा १२ मा भने २०७८ बाटै कार्यान्वयनमा आएको थियाे।

प्रकाशित मिति: बिहीबार, साउन ३, २०८१ १३:१६