कर्मदा माविका विद्यार्थी अध्ययन खर्च आफैँ जुटाउँदै

विद्यार्थी

गृहपृष्ठ
विद्यार्थी

कर्मदा माविका विद्यार्थी अध्ययन खर्च आफैँ जुटाउँदै

ईडीयू सवाल शुक्रबार, मंसिर १४, २०८१

काठमाडाैँ - तनहुँको भानु नगरपालिका-९ बाइसजाँगर स्थित कर्मदा माध्यमिक विद्यालयका विद्यार्थीले आलुखेती गरेका छन्। त्यसबाट विद्यार्थीले खर्चको जोहो गरेका छन्।

पढ्दै कमाउँदै कार्यक्रमअन्तर्गत कक्षा १० मा अध्ययनरत विद्यार्थीले दुई रोपनी जमिनमा आलुखेती गरेका हुन्। विद्यालयको छात्रावासमा बसेर अध्ययन गरिरहेका विद्यार्थीलाई खर्चको जोहो गराउन आलुखेतीमा संलग्न गरिएको र ७० किलो आलु हालै रोपिएको विद्यालयले जनाएको छ।

विद्यालयका प्रधानाध्यापक सञ्जयकुमार विकले छात्रावासमा बस्दा अभिभावकको आर्थिक लगानीलाई केही कम गर्ने र विद्यार्थीलाई आफैँप्रति जिम्मेवार बनाउन सकियोस् भन्ने उद्देश्यले आलुखेती गरिएको जानकारी दिए। उनले पढ्दै कमाउँदै कार्यक्रमले विद्यार्थीलाई श्रमप्रति सम्मानको भावनासमेत जगाउने हुँदा खेती गरिएको बताए।

आलुखेतीका लागि बारी खन्न विद्यार्थी र शिक्षकले सहयोग गरेका छन्। यस अभियानलाई प्रभावकारी ढङ्गले अगाडि बढाउँदै विद्यार्थीलाई सीपसँगै आर्थिक उपार्जनसँग जोड्न समन्वयकारी भूमिका निर्वाह गर्न स्रोत शिक्षकको व्यवस्था मिलाइएको विद्यालयले जनाएको छ।

विद्यार्थीलाई आयआर्जनसँग जोड्न र सस्कृति संरक्षण गर्ने उद्देश्यले पञ्चेबाजा बजाउने तालिम प्रदान गरिसकिएको प्रधानाध्यापक विकले जानकारी दिए। विद्यार्थीले बाजा बजाएर, तरकारी बिक्री गरेको आम्दानी आफैँले किताब, कपी, कलमलगायत शैक्षिक सामग्री खरिदमा उपयोग गर्न सक्ने भएकाले परिवारमा आर्थिक बोझ कम हुने दाबी उनको छ।

प्रधानाध्यापक बिकका अनुसार आम्दानी रकम एकमुष्ट सङ्कलन गरी विद्यार्थीलाई दामासाहीले वितरण गरिन्छ।

प्रकाशित मिति: शुक्रबार, मंसिर १४, २०८१ ११:५९