चन्द्रागिरीमा एसईई उत्तीर्ण २४ विद्यार्थीलाई कक्षा ११

विद्यार्थी

गृहपृष्ठ
विद्यार्थी

चन्द्रागिरीमा एसईई उत्तीर्ण २४ विद्यार्थीलाई कक्षा ११–१२ अध्ययनका लागि छात्रवृत्ति

ईडीयू सवाल आइतबार, जेठ ३१, २०८३

काठमाडौँ- चन्द्रागिरी नगरपालिकाको वडा अध्यक्ष शैक्षिक विकास कोषले शैक्षिक सत्र २०८३/८४ का लागि एसईई उत्तीर्ण २४ जना विद्यार्थीलाई कक्षा ११ र १२ अध्ययनका लागि छात्रवृत्ति प्रदान गरेको छ। कोषले विद्यार्थीहरूको सम्पूर्ण शैक्षिक शुल्क तथा स्टेशनरी खर्च व्यहोर्ने व्यवस्था अन्तर्गत छात्रवृत्ति प्राप्त गर्ने विद्यार्थीहरूका लागि अभिमुखीकरण कार्यक्रम समेत सम्पन्न गरेको जनाएको छ।

कार्यक्रममा कोषका सहसचिव पुष्कर आचार्य र मञ्जु पन्थीले छात्रवृत्ति कार्यक्रमको उद्देश्य, प्रक्रिया तथा विद्यार्थीहरूले पालना गर्नुपर्ने दायित्वबारे जानकारी गराएका थिए। कार्यक्रमको सञ्चालन सचिव लालबहादुर जीसीले गरेका थिए भने अध्यक्ष मोहनहरी आचार्यको अध्यक्षतामा सम्पन्न भएको थियो। सो अवसरमा संस्थापक संरक्षक तथा चन्द्रागिरी नगरपालिका–१५ का पूर्व वडा अध्यक्ष उत्तमबहादुर राउतले छात्रवृत्तिले आर्थिक रूपमा कमजोर तथा जेहेन्दार विद्यार्थीलाई उच्च शिक्षा हासिल गर्न महत्वपूर्ण सहयोग पुग्ने बताए। उनले अवसरको सदुपयोग गर्दै अध्ययनमा उत्कृष्टता हासिल गर्न विद्यार्थीहरूलाई आग्रह गरे।

कोषका अध्यक्ष मोहनहरी आचार्यका अनुसार २०७४ सालको स्थानीय तह निर्वाचनपछि तत्कालीन वडा अध्यक्ष उत्तमबहादुर राउत र वडा सदस्य माधवकुमार केसीले आफ्नो पारिश्रमिकबाट कोष स्थापना गरेका थिए। हाल कोष दैनिक एक रुपैयाँ दान गर्ने साधारण सदस्य तथा न्यूनतम ११ हजार रुपैयाँ योगदान गर्ने स्वदेश तथा विदेशमा रहेका आजीवन सदस्यहरूको सहयोगबाट सञ्चालन भइरहेको छ।

सरकारी निकायको प्रत्यक्ष आर्थिक सहयोगबिना सञ्चालन भइरहेको उक्त संस्थाले छात्रवृत्ति कार्यक्रमसँगै चन्द्रागिरी नगरस्तरीय माध्यमिक विद्यालय वक्तृत्वकला तथा चित्रकला प्रतियोगिता पनि नियमित रूपमा आयोजना गर्दै आएको छ।कोषले यसअघि विभिन्न १३ वटा उच्च माध्यमिक विद्यालयसँग समझदारी गरी छात्रवृत्ति प्रदान गर्दै आए पनि हाल सामुदायिक उच्च माध्यमिक विद्यालयमा अध्ययन गर्ने विद्यार्थीलाई प्राथमिकता दिने नीति लागू गरेको जनाएको छ।

कोषका अनुसार हालसम्म ८० जना विद्यार्थीलाई माध्यमिक तहसम्म र १३२ जना विद्यार्थीलाई कक्षा ११ र १२ अध्ययनका लागि छात्रवृत्ति उपलब्ध गराइसकिएको छ। साथै आगामी शैक्षिक सत्रदेखि विद्यालय छाडेका (ड्रपआउट) युवायुवतीलाई लक्षित गरी छोटो अवधिका व्यावसायिक तथा उद्यमशीलता तालिम सञ्चालन गर्ने तयारी समेत गरिएको छ।

प्रकाशित मिति: आइतबार, जेठ ३१, २०८३ १५:५६