सार्वजनिक विद्यालयका कक्षा ६ र ९ मा अध्ययन गर्ने विद्यार्थीलाई विपन्न लक्षित छात्रवृत्ति उपलब्ध गराउने प्रक्रिया सुरु

विद्यार्थी

गृहपृष्ठ
विद्यार्थी

सार्वजनिक विद्यालयका कक्षा ६ र ९ मा अध्ययन गर्ने विद्यार्थीलाई विपन्न लक्षित छात्रवृत्ति उपलब्ध गराउने प्रक्रिया सुरु

ईडीयू सवाल शुक्रबार, भदौ ५, २०८३

काठमाडौं- आगामी शैक्षिक सत्र २०८४ मा सार्वजनिक विद्यालयका कक्षा ६ र ९ मा अध्ययन गर्ने विद्यार्थीलाई विपन्न लक्षित छात्रवृत्ति उपलब्ध गराउने प्रक्रिया अघि बढाइएको छ। शिक्षा विभागअन्तर्गतको समावेशी शिक्षा शाखाले चालु शैक्षिक सत्र २०८३ मा कक्षा ५ र ८ मा अध्ययनरत विद्यार्थीबाट Proxy Mean Testing (PMT) फाराम भराउन सम्बन्धित विद्यालयलाई निर्देशन दिएको छ।

विभागका अनुसार सूचना प्रकाशित भएको मितिले १५ दिनभित्र PMT फाराम भरी IEMIS प्रणालीमा विवरण प्रविष्ट गर्नुपर्नेछ। विद्यालयले फाराम प्रिन्ट गरी इच्छुक विद्यार्थी वा अभिभावकलाई उपलब्ध गराउनुपर्नेछ। विद्यार्थी वा अभिभावकले फाराममा माग गरिएका सम्पूर्ण विवरण सत्य-साँचो भरी अभिभावकबाट प्रमाणित गराएर प्रधानाध्यापकसमक्ष पेश गर्नुपर्नेछ। प्रधानाध्यापकले फाराम रुजु तथा सहीछाप गरी स्थानीय तहमा प्रमाणीकरणका लागि पेश गर्नुपर्ने व्यवस्था गरिएको छ।

प्रमाणीकरणपछि विद्यालयले प्राप्त फारामका सम्पूर्ण विवरण IEMIS प्रणालीमा प्रविष्ट गर्नुपर्नेछ। त्यसका लागि IEMIS मा लगइन गरी PMT मेनुमा गएर वर्ष २०८३ र कक्षा ५ वा ८ छनोट गरी सम्बन्धित विद्यार्थीको विवरण प्रविष्ट गर्न विभागले जनाएको छ। फाराममा उल्लेख भएका विवरण प्रमाणित PMT फारामसँग हुबहु मिल्ने गरी प्रविष्ट गर्नुपर्ने र प्रविष्टिपछि प्रमाणित फाराम तथा अभिलेख विद्यालयले सुरक्षित राख्नुपर्नेछ।

विभागले सबै प्रदेशका शिक्षा विकास निर्देशनालय, शिक्षा विकास तथा समन्वय एकाइ र सामुदायिक विद्यालयलाई आवश्यक समन्वय तथा सहजीकरण गरी PMT फाराम भराउने र IEMIS मा विवरण प्रविष्ट गराउने कार्य गर्न निर्देशन दिएको छ।