आंशिक प्राध्यापकहरूले पारिश्रामिक माग गर्दै ताला लगाएपछि त्रिचन्द्रमा पठनपाठन ठप्प

कलेज

गृहपृष्ठ
कलेज

आंशिक प्राध्यापकहरूले पारिश्रामिक माग गर्दै ताला लगाएपछि त्रिचन्द्रमा पठनपाठन ठप्प

ईडीयू सवाल मंगलबार, जेठ ८, २०८१

काठमाडौँ- आंशिक प्राध्यापकहरूले पारिश्रामिक माग गर्दै ताला लगाएपछि त्रिचन्द्र क्याम्पसमा पठनपाठन ठप्प भएकाे छ। गत वर्ष साउनदेखि नै पारिश्रमिक नपाएको भन्दै आंशिक प्राध्यापकहरूले ३ जेठमा तालाबन्दी गरेका थिए।

आंशिक प्राध्यापकहरूले प्रशासन, लेखा, क्याम्पस प्रमुख, सहायक क्याम्पस प्रमुखहरूको कार्यकक्षमा ताला लगाएर पढाउन पनि छाडेका छन्। करिब ७० प्रतिशत कक्षाभार लिइरहेका आंशिक प्राध्यापकले पढाउन छाडेपछि पढाइ प्रभावित भएको त्रिवि आंशिक प्राध्यापक केन्द्रीय संघर्ष समितिका अध्यक्ष गोकुल लिम्बुले बताए।

सहायक क्याम्पस प्रमुख बालकृष्ण पौडेलले आंशिक प्राध्यापकलाई दिने पारिश्रमिकको दरमा सहमति नभएका कारण समस्या भएको बताए। लेखाले ४० मिनेट अध्यापन गराएको शिक्षकको पारिश्रामिक ३९४ रुपैयाँ मात्रै दिन मिल्ने र त्यस भन्दा बढी दिँदा बेरुजु देखिने बताएको पौडेलको भनाइ छ।

‘अघिल्लो वर्ष ४० मिनेट अध्यापन गराएको पारिश्रामिक ५९० दिइएको हो तर, पछि लेखाले ४० मिनेट पढाएको पारिश्रामिक एक घण्टा बराबरको दिन नमिल्ने भन्दै २२ लाख रुपैयाँ बेरुजु निकालेपछि हामीले उहाँहरुलाई ३९४ लिन अनुरोध गर्दा अघिल्लो वर्ष दिएर यो वर्ष किन नहुने भन्ने भएपछि समस्या भएको हो’, उनले भने।

प्रकाशित मिति: मंगलबार, जेठ ८, २०८१ २२:४९