सिन्धुपाल्चोककाे सुनकोशी क्याम्पसका अध्यक्ष तिमल्सिनाले दिए वृद्धाभत्ताबाट विद्यार्थीलाई छात्रवृत्ति

प्रेरक प्रसंग

गृहपृष्ठ
प्रेरक प्रसंग

सिन्धुपाल्चोककाे सुनकोशी क्याम्पसका अध्यक्ष तिमल्सिनाले दिए वृद्धाभत्ताबाट विद्यार्थीलाई छात्रवृत्ति

ईडीयू सवाल मंगलबार, भदौ १७, २०८२

काठमाडाैँ - सिन्धुपाल्चोककाे सुनकोशी क्याम्पस सञ्चालक समितिका अध्यक्ष सुकदेव तिमल्सिनाले आफूले राज्यबाट पाउने सामाजिक सुरक्षा भत्ता (वृद्ध भत्ता) स्नातक तहमा अध्ययनरत गरिब, जेहेन्दार, पिछडिएका वर्ग समुदायका विद्यार्थीलाई छात्रवृत्ति स्वरुप वितरण गर्दे आएका छन्।

उनले वि.स.२०७१ सालदेखि राज्यबाट पाउने ज्येष्ठ नागरिक भत्ता छात्रवृत्ति स्वरुप वितरण गर्दे आएका हुन्। उनले आफु अध्यक्ष रहेको सुनकोशी क्याम्पसको २५ औं वार्षिकोत्सव समारोहमा राज्यबाट पाउने यस बर्षकाे ज्येष्ठ नागरिक भत्ता विद्यार्थीलाई छात्रवृत्ति स्वरुप वितरण गरेका हुन्। यस वर्ष तिमल्सिनाले २ हजार ५ सयका दरले कमजोर आर्थिक अवस्थाका र जेहेन्दार विद्यार्थीलाई छात्रवृत्तिको रुपमा प्रदान गरेका क्याम्पस प्रमुख कृष्णप्रसाद आचार्यले जानकारी दिए।

सुनकोशी क्याम्पसको अध्यक्षसमेत रहेका तिमल्सिनाले ०७१ सालदेखि ०८२ सालसम्म राज्यबाट प्राप्त ज्येष्ठ नागरिक भत्ताको सबै रकम विद्यार्थीहरुलाई छात्रवृत्ति स्वरुप वितरण गर्दै आएको प्रमुख आचार्यले जानकारी दिए। राज्यबाट प्राप्त प्रत्येक वर्षको ४८ हजार भत्ता तिमल्सिनाले छात्रछात्रालाई छात्रवृत्ति स्वरुप प्रदान गर्दै आएको उनले बताए।

आगामी वर्षहरुमा पनि आफूले पाउने सामाजिक सुरक्षा बापतको सबै भत्ता रकम क्याम्पसमा अध्ययनरत बिद्यार्थीको शिक्षामा सहयोग गर्ने तिमल्सिनाले बताए। उनले उक्त क्याम्पसमा ब्यक्तिगत ७ लाख ७५ हजार रुपैयाँमा ५० जना विद्यार्थी अट्ने भवन पनि निर्माण गरेका छन्। उनको पहलमा भवन निर्माणका लागि जिल्ला समन्वय समितिबाट ४० लाख, भवन निर्माणकै लागि विश्व विद्यालय अनुदान आयोगबाट दुई पटक गरेर १ करोड अनुदान लगायतको काम भएको छ।

प्रकाशित मिति: मंगलबार, भदौ १७, २०८२ ११:२७