एकै परिवारका पाँच जना शिक्षण पेशामा

प्रेरक प्रसंग

गृहपृष्ठ
प्रेरक प्रसंग

एकै परिवारका पाँच जना शिक्षण पेशामा

ईडीयू सवाल आइतबार, असार ७, २०८३

धरान - सुनसरीको धरान उपमहानगरपालिका-१४, विजयपुरस्थित एक परिवार शिक्षण पेशामा समर्पित रहेर समाजका लागि प्रेरणाको स्रोत बनेको छ। उक्त परिवारका बुवा, छोरा, छोरी तथा ज्वाइँ सबै शिक्षण पेशामा आबद्ध रहेका छन्।

परिवारका अभिभावक लोकबहादुर कटुवाल लामो समयदेखि शिक्षण पेशामा सक्रिय छन्। उनकै प्रेरणाबाट परिवारका अन्य सदस्यहरू पनि शिक्षा क्षेत्रमा आबद्ध भएका छन्। उनकी छोरी विभूति कटुवाल (थापा), छोरा प्रमोद कटुवाल र अभिषेक कटुवाल समेत शिक्षकका रूपमा कार्यरत छन्। त्यस्तै परिवारका ज्वाइँ रविन थापा पनि शिक्षण पेशामा संलग्न रहेका छन्।

एकै परिवारका अधिकांश सदस्य शिक्षा क्षेत्रमा समर्पित हुनु आफैंमा विशेष विषय मानिएको छ। शिक्षाको माध्यमबाट समाज निर्माणमा योगदान पुर्‍याउँदै आएको यस परिवारप्रति स्थानीय समुदायले समेत सम्मान व्यक्त गर्ने गरेका छन्।

परिवारका सदस्यहरू शिक्षण पेशामा सक्रिय रहँदा नयाँ पुस्तालाई गुणस्तरीय शिक्षा प्रदान गर्न र समाजमा सकारात्मक सन्देश प्रवाह गर्न महत्वपूर्ण भूमिका निर्वाह गरिरहेको स्थानीयवासीहरूको भनाइ छ।

शिक्षण पेशालाई सेवा र सम्मानको क्षेत्रका रूपमा आत्मसात् गर्दै आएको कटुवाल परिवारले शिक्षा क्षेत्रप्रतिको समर्पण, लगनशीलता र प्रतिबद्धताको उदाहरण प्रस्तुत गरेको छ। परिवारका सबै सदस्य शिक्षक भएकोमा आफन्त तथा स्थानीयवासीहरूले गर्व महसुस गरेका छन्।

प्रकाशित मिति: आइतबार, असार ७, २०८३ १६:४३