विद्यालय कर्मचारी परिषद्ले सेवासुविधाबारे ७५३ वटै स्थानीय तहमा ज्ञापनपत्र बुझाउने

समाचार

गृहपृष्ठ
समाचार

सेवासुविधा विद्यालय कर्मचारी परिषद्ले सेवासुविधाबारे ७५३ वटै स्थानीय तहमा ज्ञापनपत्र बुझाउने

ईडीयू सवाल आइतबार, जेठ २२, २०७९

काठमाडौँ - नेपाल विद्यालय कर्मचारी परिषद्ले आफूहरूका सेवासुविधा समयानुकूल बनाउन सरकारको ध्यानाकर्षण गराउने भएको छ। परिषद्को शनिबार राजधानीमा सम्पन्न दोस्रो पूर्ण बैठकले कर्मचारीलाई राज्यले दिने तलबभत्ता र सेवासुविधाका विषयमा ७५३ वटै स्थानीय तहलाई ज्ञापनपत्र बुझाउने निर्णय गरेको हो।

परिषद्का महासचिव शान्तिनाथ योगीले बैठकले नेपाल शिक्षक महासंघसँग समन्वय गर्दै थप निर्णय गर्ने बताए। बैठकले जेठ २७ गते ७ ओटै प्रदेश सामाजिक विकास मन्त्रालयमा ज्ञापनपत्र बुझाउने, जेठ ३० गते ७५३ वटै स्थानीय तहमा ज्ञापनपत्र बुझाउने निर्णय गरेको छ।

विद्यालयमा लेखापाल र कार्यालय सहयोगी गरी दुई तहका कर्मचारी छन्। लेखापालले मासिक २० हजार पाँच सय रुपैयाँ र कार्यालय सहयोगीले १५ हजार रुपैयाँ तलब बुझ्दै आएका छन्। उनीहरूले यति रकम केन्द्र र प्रदेश सरकारबाट पाउँदै आएका हुन्। बजेट वक्तव्यमार्फत अर्थमन्त्री जनार्दन शर्माले सरकारी कर्मचारीको तलब सुविधा १५ प्रतिशत बढाउने बताइसकेका छन्।
यसअघि नेपाल शिक्षक महासंघले उनीहरुले पाउँदै आएको तलबमा अब बढेको तलब वृद्धिसमेत जोडी संघीय सरकारबाटै उपलब्ध गराउन माग गरिसकेको छ।

यस्तै बजेटबाट प्रबन्ध गरिएको सुविधासहितको १० दिने पर्यटन काज, दुर्घटना बिमा तथा स्वास्थ्य सुरक्षा बिमा विद्यालयका शिक्षक कर्मचारीको हकमा समेत लागू हुने प्रबन्ध गर्न माग गरेको छ ।

प्रकाशित मिति: आइतबार, जेठ २२, २०७९ १७:०९

#शिक्षक सेवा

प्रतिक्रिया दिनुहोस्