फ्रान्समा टिकटकविरुद्ध मुद्दा दायर

सूचना तथा प्रविधि

गृहपृष्ठ
सूचना तथा प्रविधि

फ्रान्समा टिकटकविरुद्ध मुद्दा दायर

ईडीयू सवाल बिहीबार, मंसिर ६, २०८१

काठमाडाैँ - फ्रान्समा सातवटा परिवारले आफ्ना किशोरावस्थाका छोराछोरीहरूले हानिकारक सामाग्रीहरू हेरेर आत्महत्या गरेको भन्दै सोसल मिडिया प्लेटफर्म टिकटकविरुद्ध मुद्दा दायर गरेका छन्।

टिकटकको एल्गोरिदमले किशोर किशोरीहरूलाई आत्महत्या प्रोत्साहन, आफैँलाई नोक्सानी गर्ने तथा भोजन सम्बन्धी समस्या विषयका भिडियोहरू देखाउने गरेको र सोहीबाट प्रभावित भएर २ जनाले आत्महत्या गरेको ती परिवारको दाबी छ।

टिकटक पीडित परिवारजनले संयुक्त रुपमा क्रेटेइल न्यायिक अदालतमा मुद्दा दायर गरेका छन्। निवेदकका वकिल लाउरे बोट्रोन मार्मियोनका अनुसार टिकटकविरुद्ध परिवारजनले संयुक्त रुपमा मुद्दा हालेको युरोपमा यो नै पहिलोपटक हो।

उनी भन्छिन्, ‘अभिभावकहरूले अदालतबाट टिकटकको कानुनी दायित्वको किटान होस् भन्ने चाहेका छन्। टिकटक एक व्यवसायिक कम्पनी हो र उसले बालबालिका समेतको लागि प्रडक्ट तयार पार्ने गर्दछ। त्यसैले उसले आफ्ना प्रडक्टको कमजोरीका विषयमा पनि जवाफ दिनुपर्छ।’

स्मरण रहोस् फेसबुक र इन्स्टाग्रामको मातृ कम्पनी मेटाले जस्तै टिकटकले अमेरिकामा पनि सयौँ मुद्दा झेलिरहेको छ। टिकटकले दशौँ लाख बालबालिकालाई उत्तेजित पार्दै लतमा फसाएको र उनीहरूको मानसिक स्वास्थ्यमा क्षति पुर्याएको आरोप अमेरिकामा दायर मुद्दाहरूमा लगाउने गरिएको छ।

फ्रान्समा दायर मुद्दाको विषयमा टिकटकले कुनै प्रतिक्रिया जनाएको छैन।यद्यपि बालबालिकाको मानसिक स्वास्थ्य सम्बद्ध विषयहरूलाई भने आफूले गम्भीरतापूर्वक लिएको यसअघि उसले बताउने गरेको थियो। अमेरिकी सांसदहरूले सोधेको प्रश्नमा टिकटक सिइओ शोउ जीले बालबालिकाको सुरक्षाका लागि टिकटक एपमा विभिन्न उपायहरुका लागि पर्याप्त लगानी गरिएको दाबी गरेका थिए।

प्रकाशित मिति: बिहीबार, मंसिर ६, २०८१ १३:४०