आफूले पढेकाे स्कुलकाे भवन उद्घाटन गर्न पुगे प्रधानमन्त्री ओली

विद्यालय

गृहपृष्ठ
विद्यालय

आफूले पढेकाे स्कुलकाे भवन उद्घाटन गर्न पुगे प्रधानमन्त्री ओली

ईडीयू सवाल बुधबार, मंसिर २६, २०८१

काठमाडाैँ - प्रधानमन्त्री केपी शर्मा ओलीले आफूले प्रारम्भिक शिक्षा लिएको प्रणामी माध्यमिक विद्यालयको नवनिर्मित भवनको उद्घाटन गरेका छन्।

तेह्रथुमको आठराई गाउँपालिका - ४ इवामा रहेको प्रणामी विद्यालयमा निर्माण भएको १८ कोठे भवन आज मंसिर २६ गते ओलीले रिबन काटेर उद्घाटन गरेका छन्। यस क्रममा उनले विद्यालयका विद्यार्थी, शिक्षक, स्थानीयलगायतसँग अन्तरक्रियासमेत गरेका छन्। प्रधानमन्त्री ओलीले यस विद्यालयमा कक्षा ३ सम्म अध्ययन गरेको विद्यालयका प्रधानाध्यापक अमृतबहादुर बुढाथोकीले जानकारी दिए।

दक्षिण कोरियाको युम होङ गिल ह्युमन फाउण्डेसनको सहयोगमा निर्मित उक्त भवनको हालै निर्माण सम्पन्न भएको हो। भवन निर्माणमा उक्त फाउण्डेसनले चार करोड ४९ लाख ६० हजार रुपैँया, कोशी प्रदेश सरकारले २१ लाख ४० हजार रुपैँया, र आठराई गाउँपालिकाले ६९ लाख रुपैँया लगानी गरेका छन्।

विद्यालय व्यवस्थापन समितिका अध्यक्ष भीम घिमिरेका अनुसार पुरानो भवनमा पठनपाठन गर्न समस्या भएपछि प्रधानमन्त्री ओलीलाई विद्यालयले बजेटको पहल गरिदिन आग्रह गरेको थियो।

प्रधानमन्त्री ओलीकै आग्रहका युम होङ गिल ह्युमन फाउण्डेसन दक्षिण कोरियाले मुख्य लगानी गरेपछि भवन निर्माण भएको घिमिरेले बताए। कार्यक्रममा नेपालका लागि दक्षिण कोरियाली राजदूत पार्क ते योङ, युम होङ गिल ह्युमन फाउण्डेसनका पार्क यु सुन लगायतको उपस्थिति थियो।

प्रकाशित मिति: बुधबार, मंसिर २६, २०८१ १५:२०