मोरङ- जहदा गाउँपालिकाले गाउँपालिकाभित्रका सामुदायिक विद्यालयमा रिक्त प्रधानाध्यापक पदपूर्तिका लागि आवेदन आह्वान गरेको छ। गाउँपालिकाले सम्बन्धित तहमा तोकिएको योग्यता पुगेका स्थायी शिक्षकबाट प्रधानाध्यापक पदका लागि दरखास्त माग गरेको हो।
गाउँपालिकाले शिक्षा नियमावली, २०५९ को दसौँ संशोधनसहितको नियम ९३ को उपनियम २ बमोजिम प्रधानाध्यापक पदपूर्तिको प्रक्रिया अघि बढाएको जनाएको छ। इच्छुक स्थायी शिक्षकले सूचना प्रकाशित भएको मितिले ३० दिनभित्र गाउँ कार्यपालिकाको कार्यालयमा आवेदन पेस गर्नुपर्नेछ।
आवेदनसँगै शिक्षा नियमावलीको अनुसूची १३ को (५) बमोजिम तयार गरिएको विद्यालय विकास प्रस्तावसमेत अनिवार्य रूपमा पेस गर्नुपर्ने गाउँपालिकाले जनाएको छ। प्रधानाध्यापक छनोटमा विद्यालयको शैक्षिक सुधार र विकासका लागि उम्मेदवारले प्रस्तुत गर्ने योजनालाई समेत आधार बनाइनेछ।
माध्यमिक तहको प्रधानाध्यापक पदका लागि सम्बन्धित विद्यालयको माध्यमिक तहमा स्नातकोत्तर उत्तीर्ण गरेको स्थायी शिक्षक हुनुपर्नेछ। त्यस्तै, शिक्षा शास्त्रमा स्नातक तह वा सो सरहको परीक्षा उत्तीर्ण गरी कम्तीमा पाँच वर्ष स्थायी सेवा गरेको शिक्षकले समेत आवेदन दिन सक्ने व्यवस्था गरिएको छ।
आधारभूत तहको प्रधानाध्यापकका लागि सम्बन्धित विद्यालयको आधारभूत तहमा स्नातक उत्तीर्ण गरेको स्थायी शिक्षक हुनुपर्नेछ। शिक्षा शास्त्रमा प्रमाणपत्र तह वा सो सरहको परीक्षा उत्तीर्ण गरी कम्तीमा पाँच वर्ष स्थायी सेवा गरेको शिक्षक पनि उक्त पदका लागि योग्य हुने सूचनामा उल्लेख छ।
गाउँपालिकाले प्रधानाध्यापक पदका लागि आवेदन दस्तुरसमेत तोकेको छ। माध्यमिक तहका लागि २ हजार रुपैयाँ र आधारभूत तहका लागि १ हजार ५०० रुपैयाँ आवेदन दस्तुर बुझाउनुपर्नेछ।
आवेदनसँगै व्यक्तिगत विवरणसहितको निवेदन, विद्यालय विकास प्रस्ताव, शैक्षिक योग्यताका प्रमाणपत्र, स्थायी नियुक्तिपत्र, बढुवा भएको पत्र, तालिमका प्रमाणपत्र तथा शिक्षण अनुभव खुल्ने प्रमाणपत्रका प्रतिलिपि पेस गर्नुपर्नेछ।
यसैगरी, सम्बन्धित तहमा आफूले अध्यापन गरेको विषयमा पछिल्लो तीन वर्षको विद्यार्थी उत्तीर्ण प्रतिशत खुल्ने विद्यालयबाट प्रमाणित कागजातसमेत आवेदनसँगै बुझाउनुपर्ने व्यवस्था गरिएको छ। यसले उम्मेदवारको शैक्षिक कार्यसम्पादन र विद्यार्थीको सिकाइ उपलब्धिलाई समेत छनोट प्रक्रियामा आधार बनाउने देखिन्छ।
गाउँपालिकाले तोकिएको योग्यता तथा आवश्यक कागजात पूरा गरेका इच्छुक स्थायी शिक्षकलाई निर्धारित समयभित्र आवेदन पेस गर्न आग्रह गरेको छ। प्रधानाध्यापक नियुक्तिको प्रक्रियाबाट सामुदायिक विद्यालयको नेतृत्व, शैक्षिक गुणस्तर र व्यवस्थापन सुधार गर्ने लक्ष्य गाउँपालिकाले लिएको छ।
-1791118090-1791120182.jpg)
