बूढीगण्डकी बाढीप्रति गगन थापाको दुःख, तटीय क्षेत्रका बासिन्दालाई सतर्क रहन आग्रह

समाचार

गृहपृष्ठ
समाचार

बूढीगण्डकी बाढीप्रति गगन थापाको दुःख, तटीय क्षेत्रका बासिन्दालाई सतर्क रहन आग्रह

ईडीयू सवाल आइतबार, असोज २५, २०८३

काठमाडौँ- नेपाली कांग्रेसका सभापति गगन थापाले गोरखाको चुमनुब्री क्षेत्रमा बूढीगण्डकी नदीमा आएको भीषण बाढीले ठूलो क्षति पुर्‍याउनुका साथै दुईवटा पुल बगाएको घटनाप्रति दुःख व्यक्त गरेका छन्।

थापाले सामाजिक सञ्जाल फेसबुकमार्फत घटनाप्रति दुःख व्यक्त गर्दै बूढीगण्डकीदेखि त्रिशूली नदी किनारसम्मका तटीय क्षेत्रमा बसोबास गर्ने नागरिकलाई उच्च सतर्कता अपनाउन आग्रह गरेका हुन्।

बाढीले न्याक्चेत–फिलिम र धादिङ–गोरखा जोड्ने पुल बगाएको उल्लेख गर्दै उनले नदी आसपासका बासिन्दालाई सुरक्षित स्थानमा रहन अनुरोध गरेका छन्। साथै, स्थानीय प्रशासनले जारी गर्ने सूचना तथा निर्देशनको पालना गर्न पनि उनले आग्रह गरेका छन्।

बाढीका कारण प्रभावित क्षेत्रमा थप जोखिम उत्पन्न हुन सक्ने सम्भावनालाई ध्यानमा राख्दै थापाले नागरिकलाई आवश्यक सावधानी अपनाउन र सम्भावित विपद्बाट जोगिन सचेत रहन अपिल गरेका छन्।

उनले विपद्को यस कठिन घडीमा प्रभावित नागरिकको उद्धार, राहत वितरण तथा आवश्यक सहयोगका कार्यमा सक्रिय रूपमा जुट्न नेपाली कांग्रेसका सम्पूर्ण नेता तथा कार्यकर्तालाई आग्रह गरेका छन्।

बाढी प्रभावित नागरिकको सुरक्षालाई प्राथमिकतामा राख्दै उद्धार तथा राहत कार्यमा सहयोग गर्नुपर्नेमा जोड दिएका थापाले नदी तटीय क्षेत्रका बासिन्दालाई सुरक्षित स्थानमा बस्न र जोखिमपूर्ण क्षेत्रमा नजानसमेत आग्रह गरेका छन्।

प्रकाशित मिति: आइतबार, असोज २५, २०८३ १३:०६