मेटाले ल्यायो नयाँ एप

सूचना तथा प्रविधि

गृहपृष्ठ
सूचना तथा प्रविधि

मेटाले ल्यायो नयाँ एप

ईडीयू सवाल बुधबार, माघ ९, २०८१

काठमाडाैँ - फेसबुकको मातृ कम्पनी मेटाले अमेरिकामा टिकटक बन्द मौकाको फाइदा उठाउँदै एउटा नयाँ एपको घोषणा गरेको छ।यसअघि भारतमा टिकटक प्रतिबन्धित हुँदा तुरुन्तै इन्स्टाग्रामले शर्ट भिडियो प्लाटफर्म रील्स ल्याएको थियो। फेसबुकको रील्सले भारतमा मात्र नभई विश्वभर नै राम्रै लोकप्रियता कमाइरहेको छ। त्यहीँ सफलताबाट लोभिएको मेटाले अमेरिकामा टिकटकले सामना गरिरहेको संकटका बीच Edit (एडिट) नामक नयाँ एप लञ्च गरेको हो।

टिकटकसँगै चिनियाँ बाइटडान्सको अर्को एप क्यापकट पनि अमेरिकामा एपस्टोरबाट हटेको मौका छोपेर मेटाले Edit एप ल्याएको हो। एडिट एप क्यापकटकै क्लोन अर्थात् हुबहु नक्कल जस्तै छ।इन्स्टाग्रामका प्रमुख एडम मोसेरीले आउँदो महिनादेखि एडिट एप आइओएसमा उपलब्ध हुनेछ र त्यसपछि एन्ड्रोइडका लागि पनि लञ्च गरिने बताएका छन्।

वास्तवमा एडिट एट पूर्णरुपमा मोबाइल भिडियो एडिटिङ सफ्टवेयर हो। यो खासगरी भिडियो सामग्री सर्जकका लागि सर्वोत्तम टूल भएको दाबी गरिएको छ। यो एपमा विभिन्न क्रियटिभ टुल्सहरु हुनेछन्। यसमा विभिन्न ट्याबहरु पनि रहनेछन् जहाँ विभिन्न खालका अवधारणा हुनेछन्।

यो एपबाट सम्पादित भिडियोका ड्राफ्टलाई साथीसँग शेयर गर्नपनि सकिनेछ। अर्थात् आधामात्रै सम्पादन भएको भिडियो पनि सहकार्यका लागि कुनै साथी वा कम्पनीलाई पठाउन सकिनेछ ताकि सम्पादित भिडियोमा अरुपनि फुटेजहरु थप्न सकियोस्।

इन्स्टाग्रामका अनुसार सर्जकहरुले उक्त एपका माध्यमबाट सम्पादन गरिएका भिडियोहरु इन्स्टाग्रामा शेयर गरिसकेपछि कस्तो चर्चा पाइरहेका छन् भनेर पनि थाहा पाउन सक्नेछन्।

मेटाका अनुसार एडिट एप कुनै एमेच्योर भिडियो निर्मातालाई भन्दा सर्जकलाई ध्यानमा राखेर तयार पारिएको हो। अर्थात् यसमा सर्जकसँग सम्बन्धित विभिन्न टूल्स हुनेछन् जसले रील्स सम्पादन गर्न सहयोग गर्नेछन्। त्यहाँ ड्यासबोर्ड पनि हुनेछ जहाँबाट भिडियो सम्पादनको गतिविधि पनि निगरानी गर्न सकिन्छ।

प्रकाशित मिति: बुधबार, माघ ९, २०८१ १४:१३