सरकारी लगानीमा सात स्थानमा मेडिकल कलेज स्थापना हुन्छ : शिक्षामन्त्री

समाचार

गृहपृष्ठ
समाचार

सरकारी लगानीमा सात स्थानमा मेडिकल कलेज स्थापना हुन्छ : शिक्षामन्त्री

ईडीयू सवाल शनिबार, माघ २७, २०८०

गाइघाट- शिक्षा विज्ञान तथा प्रविधिमन्त्री अशोक राईले मुलुकका विभिन्न सात स्थानमा सरकारी लगानीमा मेडिकल कलेज स्थापना गर्न मन्त्रालयले द्रुत गतिमा काम गरिरहेको बताएका छन्।

सो कुरा मन्त्री राईले शनिबार उदयपुरको गाईघाटस्थित मेडिकल कलेज निर्माणका लागि प्रस्ताव गरिएको जग्गाको निरीक्षणपछि त्रियुगा नगरपालिकाको सभा कक्षमा आयोजित एक कार्यक्रममा बताएका हुन्।

स्वास्थ्य शिक्षालाई सहज सुलभ र विकेन्द्रित गने उद्देश्य अनुरूप इलाम, उदयपुर, बर्दिबास, बुटवल सुर्खेत, कैलाली र डडेलधुरामा मेडिकल कलेज स्थापना गर्ने निश्चित भएको उनले बताए। त्यसमध्ये कैलालीमा भने सहिद दशरथचन्द स्वास्थ्य विज्ञान विश्वविद्यालय नै बनिसकेको र आगामी शैक्षिक वर्षबाट विद्यार्थी भर्ना अभियान सुरु हुने बताए।

अन्य सबै जिल्लामा जग्गा प्राप्ति भएर मेडिकल कलेज स्थापना गर्ने तयारी भएको तर उदयपुरमा भने यसको काम ढिलाइ भएकाले यहाँको जग्गा प्राप्ति लगायतका कामहरू के कस्तो अवस्थामा छ भन्ने जानकारी तथा मेडिकल कलेज स्थापनाका लागि प्रस्ताव गरिएको जग्गाको स्थलगत निरीक्षणका लागि आफू यहाँ आएको बताए।

मेडिकल कलेज निर्माणका लागि प्रस्ताव गरिएको त्रिनपा ४ वगाहाको फर्सेठ क्षेत्रमा रहेको करिब एकसय बिगाहा जग्गा प्राप्त गर्ने प्रक्रियामा लाग्न र तत्काल यो कामलाई अगाडि बढाउन त्रियुगा नगरपालिकालाई उहाँले अनुरोध पनि गरेका छन्।

प्रकाशित मिति: शनिबार, माघ २७, २०८० १२:०९