इक्यान र सिटिजन बैँकबीच सहकार्य गर्ने सम्झौता

समाचार

गृहपृष्ठ
समाचार

इक्यान र सिटिजन बैँकबीच सहकार्य गर्ने सम्झौता

ईडीयू सवाल मंगलबार, मंसिर २३, २०८२

काठमाडाैँ - नेपाल शैक्षिक परामर्श संघ (इक्यान) र नेपाल राष्ट्र बैँकद्वारा 'क' वर्गकाे इजाजत प्राप्त सिटिजन्स बैँक इन्टरनेसनल लिमिटेडबीच सहकार्य सम्झौतापत्रमा हस्ताक्षर भएको छ। इक्यानमा आबद्ध व्यवसायी, विद्यार्थी तथा अभिभावक र इक्यान सदस्यहरुलाई सिटिजन्स बैँकले प्रदान गर्ने सेवाहरूमा विशेष छुट दिइने सम्झौतापत्रमा उल्लेख छ।

मंगलबार नयाँबानेश्वर स्थित एभरेष्ट होटलमा भएको ’१६ औँ इक्यान मल्टि डेस्टिनेशन एजुकेशन फेयर २०२५’ मा सिटिजन्स बैँकका तर्फबाट मास बैँकिङ अधिकृत रोशन मानन्धर र नेपाल शैक्षिक परामर्श संघका तर्फबाट इक्यानका अध्यक्ष शेषराज भट्टाराईले सम्झौतापत्रमा हस्ताक्षर गरेका हुन्। सम्झौता अनुसार बैँकले इक्यानमा आबद्ध व्यवसायी र इक्यान सदस्यहरुलाई विशेष छुट उपलब्ध गराउनुको साथै थप सहजता प्रदान गर्नेछ। सिटिजन्स बैँकका मास बैँकिङ अधिकृत मानन्धरले इक्यानलाई सहज रुपमा सेवा उपलब्ध गराउने प्रतिवद्धता जनाउदैँ इक्यानसँगको सहकार्यको लागि आफूहरु उत्साहित रहेको बताए।

सिटिजन्स बैँक डिल्लिबजारका शाखा प्रबन्धक सुमी मल्लले सम्झौताको लागि इक्यानलाई धन्यावाद ज्ञापन गर्दै यस बैँकले विदेश अध्ययनमा जाने विद्यार्थीहरुलाई सहज रुपमा विशेष छुटका साथ सेवा प्रदान गर्दै आएको बताइन्। इक्यानका अध्यक्ष शेषराज भट्टाराईले इक्यानका सम्पूर्ण सदस्य, विद्यार्थी तथा अभिभावकले सिटिजन बैँकको सेवालाई सहजतापूर्वक प्रयोग गर्न पाउने बताउँदै सहकार्यको लागि बैँकका सम्पूर्ण टिमलाई धन्यावाद ज्ञापन गरे।

इक्यान केन्द्रिय कार्यालयका कोषाध्यक्ष आषिक कार्कीले सिटिजन्स बैँकसँग भएको सम्झौता अनुसार व्यवसायी, विद्यार्थी र इक्यान सदस्यहरुलाई विशेष छुट उपलब्ध हुने बताए। साथै उनले यस सम्झौता अनुसारको सेवा प्राप्त गर्नको लागि इक्यानसँग आबद्ध सम्पूर्ण परामर्शदाताहरुले इक्यानमा सम्पर्क गर्न समेत आग्रह गरे। नेपाल शैक्षिक परामर्श संघ नेपालको सबैभन्दा ठूलो गुणस्तरीय वैदेशिक शैक्षिक परामर्श प्रदान गर्ने संस्थाहरुको छाता संगठन हो।