सरकारले एसईईमा ‘ननग्रेडेड’ भएका विद्यार्थीका लागि विशेष तयारी कक्षा सञ्चालन गर्ने

समाचार

गृहपृष्ठ
समाचार

सरकारले एसईईमा ‘ननग्रेडेड’ भएका विद्यार्थीका लागि विशेष तयारी कक्षा सञ्चालन गर्ने

ईडीयू सवाल मंगलबार, वैशाख २९, २०८३

काठमाडौँ- शिक्षा, विज्ञान तथा प्रविधिमन्त्री सस्मित पोखरेलले माध्यमिक शिक्षा परीक्षा (एसईई ) मा ‘ननग्रेडेड’ भएका विद्यार्थीका लागि सरकारले विशेष तयारी कक्षा सञ्चालन गर्ने बताएका छन्। प्रतिनिधिसभाअन्तर्गत शिक्षा, स्वास्थ्य तथा सूचना प्रविधि समितिको मंगलबार बसेको बैठकमा बोल्दै मन्त्री पोखरेलले ग्रेडवृद्धि (मौका) परीक्षामा सहभागी हुने विद्यार्थीलाई लक्षित गरेर तयारी कक्षा सञ्चालन गरिने जानकारी दिएका हुन्।

उनले सरकारले एक महिनाभित्र एसइई नतिजा सार्वजनिक गर्ने प्रतिबद्धता पूरा गरेको उल्लेख गर्दै अब असफल भएका विद्यार्थीलाई पुनः सफल बनाउन केन्द्रित कार्यक्रम अघि बढाइने बताए। सोमबार सार्वजनिक नतिजाअनुसार कुल परीक्षार्थीमध्ये २ लाख ८४ हजार १६० जना अर्थात् ६५.९८ प्रतिशत विद्यार्थी उत्तीर्ण भएका छन् भने १ लाख ४६ हजार ५०७ विद्यार्थी ननग्रेडेड भएका छन्।

सांसदहरूले बैठकमा सुकुम्बासी बस्तीबाट विस्थापित बालबालिकाको शिक्षामा विशेष ध्यान दिन, शिक्षा विधेयक तत्काल ल्याउन तथा विद्यार्थीका लागि ई–बुकको व्यवस्था गर्न सरकारलाई सुझाव दिएका छन्। त्यसैगरी विद्यालय खाजा कार्यक्रममा देखिएका अनियमितता नियन्त्रण गर्न, विभिन्न प्रकारका शिक्षकका समस्या समाधान गर्न तथा व्यावसायिक र सीपमूलक शिक्षालाई प्रभावकारी बनाउन पाठ्यक्रम परिमार्जन गर्नुपर्ने विषयमा पनि सांसदहरूले जोड दिएका छन्।

प्रकाशित मिति: मंगलबार, वैशाख २९, २०८३ १७:४७