विदेशी विश्वविद्यालयसँग सम्बन्धन लिएका कलेजलाई नियमन गर्न नयाँ नियमावली ल्याइदै

समाचार

गृहपृष्ठ
समाचार

विदेशी विश्वविद्यालयसँग सम्बन्धन लिएका कलेजलाई नियमन गर्न नयाँ नियमावली ल्याइदै

ईडीयू सवाल आइतबार, जेठ १०, २०८३

काठमाडौँ - शिक्षा तथा खेलकुदमन्त्री सस्मित पोखरेलले विदेशी विश्वविद्यालयसँग सम्बन्धन लिएका कलेजलाई व्यवस्थित र प्रभावकारी रूपमा नियमन गर्न नयाँ नियमावली ल्याइने बताएका छन्।

आइतबार आयोजित कार्यक्रममा बोल्दै मन्त्री पोखरेलले विदेशी विश्वविद्यालयसम्बद्ध कलेजका विषयमा मन्त्रालयमा धेरै गुनासा आउने गरेको उल्लेख गर्दै त्यसलाई स्पष्ट कानुनी दायराभित्र ल्याउन नियमावली तयार पारिएको जानकारी दिएका हुन्। उनका अनुसार शिक्षा मन्त्रालयले नियमावलीको अन्तिम मस्यौदा तयार गरी अर्थ मन्त्रालय र कानून मन्त्रालयमा पठाइसकेको छ। ती मन्त्रालयबाट आवश्यक राय तथा स्वीकृति प्राप्त भएपछि नियमावली मन्त्रिपरिषद्मा पेश गरिने तयारी गरिएको छ। मन्त्री पोखरेलले विदेशी विश्वविद्यालयसँग सम्बन्धन लिएका कलेज हालसम्म प्रभावकारी रूपमा नियमन हुन नसकेको पनि बताए। कुन विश्वविद्यालयलाई सम्बन्धन दिन मिल्ने,कुनलाई नदिने तथा नियमनको मापदण्ड कस्तो हुने भन्ने विषय नियमावलीमार्फत स्पष्ट गरिने उनकोे भनाइ छ।

नेपाली विश्वविद्यालय तथा कलेजहरू नियमनको दायरामा रहे पनि विदेशी विश्वविद्यालयसम्बद्ध कलेजहरू व्यवस्थित रूपमा सञ्चालन र अनुगमन हुन नसकेको पनि उनले बताए। मन्त्री पोखरेलका अनुसार शिक्षा मन्त्रालयले हाल तीन वटा महत्वपूर्ण नियमावली एकसाथ अघि बढाइरहेको छ। तीमध्ये शिक्षा नियमावली, शैक्षिक परामर्श संस्था (कन्सल्टेन्सी) नियमनसम्बन्धी नियमावली तथा विदेशी विश्वविद्यालयसम्बद्ध कलेज नियमनसम्बन्धी नियमावली रहेका छन्।

शिक्षा ऐन तत्काल संसद्को चालु अधिवेशनमा ल्याउन सम्भव नभएकाले शिक्षा क्षेत्रलाई व्यवस्थित बनाउन शिक्षा नियमावलीलाई प्राथमिकताका साथ अघि बढाइएको उनले बताएका छन्। मन्त्री पोखरेलले विद्यालयमा शिक्षक दरबन्दी मिलानको प्रक्रिया पनि अगाडि बढाइएको बताउँदै स्थानीय तहसँगको समन्वयमा शिक्षक व्यवस्थापनको काम भइरहेको जानकारी दिए।

प्रकाशित मिति: आइतबार, जेठ १०, २०८३ १३:२३