बाढीका कारण अभिभावकविहीन भएका केटाकेटीहरूको पठनपाठनको जिम्मेवारी लिनुपर्छ : सभापति थापा

समाचार

गृहपृष्ठ
समाचार

बाढीका कारण अभिभावकविहीन भएका केटाकेटीहरूको पठनपाठनको जिम्मेवारी लिनुपर्छ : सभापति थापा

ईडीयू सवाल आइतबार, भदौ १४, २०८३

काठमाडौँ- नेपाली कांग्रेसका सभापति गगनकुमार थापा बाढी प्रभावित क्षेत्रको स्थलगत निरीक्षण तथा राहत व्यवस्थापनको अवस्थाबारे जानकारी लिन जाने भएका छन्। आइतबार ललितपुरस्थित पार्टी केन्द्रीय कार्यालयमा बसेको पदाधिकारी तथा काठमाडौंमा उपलब्ध केन्द्रीय सदस्यहरूको बैठकमा सभापति थापाले आफू नेतृत्वको टोली सोमबार बाढी प्रभावित क्षेत्रमा जाने जानकारी दिएका हुन्।

थापाका अनुसार टोलीमा पार्टीका केन्द्रीय नेताहरू, प्रभावित क्षेत्रमा जान इच्छुक नेता-कार्यकर्ता तथा विपद् व्यवस्थापन टोलीका सदस्यहरू सहभागी हुनेछन्। टोलीले प्रभावित क्षेत्रको अवस्था, स्थानीय आवश्यकता तथा राहत र उद्धारका गतिविधिबारे प्रत्यक्ष जानकारी लिनेछ। बैठकमा थापाले बाढीका कारण सयौँ बालबालिका अभिभावकविहीन भएको उल्लेख गर्दै उनीहरूको शिक्षा निरन्तरताका लागि जिम्मेवारी लिनुपर्ने आवश्यकता औँल्याए। सयौँ केटाकेटीहरू अभिभावकविहीन भएका छन्, तिनको पठनपाठनको जिम्मेवारी लिनुपर्नेछ, थापाले भने ।

विपद्को यस्तो अवस्थामा सबै मिलेर प्रभावित नागरिकको सहयोगमा जुट्नुपर्नेमा उनले जोड दिए । जिल्ला तथा वडा तहमा रहेका वास्तविक आवश्यकताबारे प्रत्यक्ष जानकारी लिएर सोहीअनुसार राहत, सहयोग र व्यवस्थापनका काम अघि बढाउनुपर्ने उनको भनाइ छ ।

प्रकाशित मिति: आइतबार, भदौ १४, २०८३ १८:२७