त्रिशूली–३ ‘ए’ सुरुङबाट उद्धार गरिएका दुईमध्ये एकको अवस्था गम्भीर

समाचार

गृहपृष्ठ
समाचार

त्रिशूली–३ ‘ए’ सुरुङबाट उद्धार गरिएका दुईमध्ये एकको अवस्था गम्भीर

ईडीयू सवाल शुक्रबार, भदौ १९, २०८३

काठमाडौं- रसुवाको भोटेकोशी नदीमा आएको भीषण बाढीपछि त्रिशूली–३ ‘ए’ जलविद्युत् आयोजनाको सुरुङबाट उद्धार गरिएका दुई जनामध्ये कबीर महर्जनको अवस्था गम्भीर रहेको छ भने सञ्जय साहको अवस्था सामान्य रहेको छ।

गम्भीर अवस्थामा रहेका महर्जनलाई यसअघि नै छाउनीस्थित वीरेन्द्र सैनिक अस्पतालमा भर्ना गरी सघन उपचार भइरहेको छ। उनको स्वास्थ्य अवस्था जटिल रहेको बताइएको छ।

यस्तै, सुरुङबाट सुरुमा उद्धार गरिएका साहको अवस्था भने सामान्य र स्थिर रहेको छ। थप परीक्षण तथा उपचारका लागि उनलाई पनि वीरेन्द्र सैनिक अस्पताल ल्याउने तयारी गरिएको छ।

नेपाली सेनाको नेतृत्वमा नेपाल प्रहरी, सशस्त्र प्रहरी बल तथा प्राविधिक एवं विज्ञसहितको संयुक्त टोलीले शुक्रबार बिहान त्रिशूली–३ ‘ए’ आयोजनाको सुरुङभित्रबाट दुवै जनाको उद्धार गरेको हो।

भोटेकोशी नदीमा आएको भीषण बाढीपछि आयोजनाको सुरुङभित्र मानिसहरू फसेको आशंका गरिएको थियो। त्यसपछि सुरक्षाकर्मी तथा उद्धार टोलीले सुरुङभित्र फसेकाहरूको खोजी तथा उद्धारका लागि निरन्तर प्रयास गर्दै आएका थिए।

लामो प्रयासपछि उद्धार गरिएका दुवै जनालाई तत्काल स्वास्थ्य उपचारका लागि अस्पताल लगिएको हो। उद्धारपछि उनीहरूको स्वास्थ्य अवस्थाबारे थप परीक्षण तथा उपचार भइरहेको छ।