शिक्षा विधेयकबारे छ विद्यार्थी संगठन : शिक्षालाई निजीकरण गर्न खोज्ने माफिया सलबलाए

समाचार

गृहपृष्ठ
समाचार

शिक्षा विधेयक लागु गर्न माग शिक्षा विधेयकबारे छ विद्यार्थी संगठन : शिक्षालाई निजीकरण गर्न खोज्ने माफिया सलबलाए

ईडीयू सवाल बिहीबार, साउन २५, २०८०

काठमाडौं- छ विद्यार्थी संगठनले संघीय शिक्षा ऐन ल्याउँदा सरकारले राम्रो काम गरेको भए पनि शिक्षालाई निजीकरण गर्न लागेका माफियाहरू सलबलाएको आरोप लगाएका छन्।

उनीहरूले सरकारलाई धन्यवाद दिँदै यही कानुनमार्फत शिक्षामा निजीकरण रोक्नुपर्ने बताएका हुन्।

नेपाली कांग्रेस, नेकपा माओवादी केन्द्र, जनता समाजवादी पार्टी, एकीकृत समाजवादी, विप्लव नेतृत्वको नेपाल कम्युनिस्ट पार्टी र राष्ट्रिय जनमोर्चाका विद्यार्थी संगठनले बिहीबार संयुक्त विज्ञप्ति निकालेर संघीय शिक्षा ऐन छिटो पास गरेर शिक्षामा निजीकरण रोक्नैपर्ने बताएका हुन्।

‘शिक्षा जस्तो आम नागरीकको मौलिक अधिकारको प्रत्याभूति गराउनको लागि नेपाल सरकार यसको पक्षमा दृढतापूर्वक उभिनु पर्दछ । शिक्षामा भइरहेको निजीकरणको अन्त्य र सवैको पहुँचमा गुणस्तरीय सार्वजनिक शिक्षाको सुदृढिकरणको पक्षमा हाम्रो संघर्ष निरन्तर अगाडि वढ्ने प्रतिवद्धता व्यक्त गर्दै प्रस्तावित ऐन रोक्न कुनै खालका अवरोध र षड्यन्त्रहरु भएमा त्यसको कडा भन्दा कडा प्रतिवाद गर्ने चेतावनी समेत यसै विज्ञप्तिमार्फत दिन चाहन्छौं’, उनीहरुले संयुक्त विज्ञप्तिमा भनेका छन् ।

नेपालको संविधानको धारा ३१ मा आधारभूत शिक्षा अनिवार्य र माध्यमिक शिक्षा निःशुल्क उल्लेख गरिएको भन्दै विद्यार्थी संगठनहरुले शिक्षा क्षेत्रमा व्यापारीकरण र माफियाकरण रोक्नुपर्ने बताएका छन् ।