काठमाडाैँ - कला र सृजनशीलतालाई नयाँ उचाइ दिँदै मदरल्याण्ड स्कुलमा पहिलो पटक अन्तर विद्यालय नाटक प्रतियोगिता सम्पन्न भएको छ। नेसनल प्याव्सन भक्तपुर अन्तर्गत मदरल्याण्ड स्कुलको आयोजनामा सम्पन्न भएको प्रतियोगितामा विद्यालयहरूले आफ्ना कथा र कला कौशललाई जीवन्त रूप दिएका थिए।
निर्णायक मण्डललाई समेत प्रभावित पार्दै ऋतम्भरा पाठशालाले प्रथम स्थान हासिल गरेकाे थियाे। त्यसैगरी, ईडेन गार्डेनले दोस्रो र संस्कार गुरूकूलले तेस्रो स्थान र विमल मेमोरियल विद्यापीठले सान्त्वना स्थान हासिल गर्न सफल भएकाे थियाे। प्रतियोगितामा विद्यार्थीहरुले लुकेको प्रतिभा प्रस्फुटन गरेका थिए।
कलाकारिताको उत्कृष्ट नमुना प्रस्तुत गर्दै, आरक्षण नेसनल स्कुलकी छात्रा यूनिशा खत्रीले ‘उत्कृष्ट कलाकार’ को उपाधि प्राप्त गरेकी थिइन्। अन्य सब–टाइटल अवार्डहरूमा पाथिभरा एकेडेमीले उत्कृष्ट प्रस्तुति, क्वालिटी स्कुलले उत्कृष्ट निर्देशन, यूनिटी स्कुलले उत्कृष्ट सन्देश, जागृति विद्या सदनले उत्कृष्ट मञ्च व्यवस्थापन र संस्कार गुरूकूलले उत्कृष्ट कथाको अवार्ड हात पारेका थिए।
कार्यक्रमका प्रमुख अतिथि एवं मुख्य निर्णायकका रुपमा रङ्गकर्मी केदार श्रेष्ठले विद्यालय स्तरमा भएको यो नाटक प्रतियोगितालाई ‘सम्भवतः पहिलो र साहसिक अनुभव’ भन्दै आयोजकको खुलेर प्रशंसा गरेका थिए। उनले यस्ता पहलहरूले युवा पुस्तामा कलाप्रतिको समर्पण बढाउने बताए।
नेसनल प्याव्सन भक्तपुरका अध्यक्ष संजय खड्काले नाटक केवल मनोरञ्जनको साधन नभई विद्यार्थीको क्षमता अभिवृद्धि गर्ने सशक्त माध्यम भएको र यसले समाज र राष्ट्रमा सकारात्मक प्रभाव पार्ने विश्वास व्यक्त गरे। मदरल्याण्ड स्कुलकी सञ्चालक शर्मिला देउजाको सभापतित्वमा सम्पन्न यस प्रतियोगिताको निर्णायक मण्डलमा प्रख्यात नायिका तथा नाटक प्रशिक्षक आरती गौतम र प्रतिभाशाली थिएटर कलाकार एडेन बात्री रहेका थिए।
कार्यक्रम संयोजक विष्णु प्रसाद दुवालका अनुसार, नेसनल प्याव्सन भक्तपुरका सल्लाहकार, पदाधिकारीहरू र विभिन्न विद्यालयका प्रिन्सिपलहरूको उत्साहजनक उपस्थिति थियो।
