काठमाडौँ - काठमाडौँ महानगरपालिकाले सामुदायिक विद्यालयका ३६ हजार २८० जनालाई एकीकृत डिजिटल हाजिरी प्रणालीमा आबद्ध गराएको छ। विद्यालयलाई प्रविधिमैत्री बनाउने कार्यअन्तर्गत सामुदायिक विद्यालयमा अध्ययनरत विद्यार्थी र कार्यरत शिक्षक, प्रारम्भिक बाल विकास केन्द्रका सहजकर्ता, आया तथा अन्य सबै प्रकारका कर्मचारी गरी ८३ वटा विद्यालयका ३६ हजार २८० जनालाई एकीकृत डिजिटल हाजिरी प्रणालीमा आबद्ध गराइएको महानगरपालिका शिक्षा विभागका प्रमुख नमराज ढकालले जानकारी दिए।
गत १३ माघमा कार्यवाहक प्रमुख सुनिता डंगोलले, विद्यालयमा एकीकृत विद्युतीय हाजिरी प्रणाली कार्यान्वयनमा ल्याउन निर्देशन दिएपछि शिक्षा विभाग र सूचना प्रविधि विभागले काम सुरु गरी विद्यालय परिवारलाई प्रविधिमा आबद्ध गराएको हो।
डाटा इन्ट्री गराउने, अद्यावधिक गराउने, प्रतिवेदन बनाउने क्षमता विकास गरिएपछि विद्यालयकै जनशक्तिबाट प्रणालीमा तथ्यांक प्रविष्ट गराइएको हो। शिक्षक, कर्मचारी र विद्यार्थी गरी कक्षा १० सम्मका करिब ४५ हजार सङ्ख्या रहेको ढकालले जानकारी दिए।
विभागले २०८२ चैत १ देखि विद्यालयहरूमा पठाउने अनुदान तथा निकासा हाजिरी प्रणालीमा आबद्ध भएको तथ्यांक तथा अभिलेखका आधारमा पठाउने निर्णय गरेको थियो।
यही १३ र १४ फागुनमा विभागले सामुदायिक विद्यालयका प्रधानाध्यापकहरूसँगको बैठकमा प्रणालीलाई प्रभावकारी कार्यान्वयन नगरे अनुदान रकम पठाउन नसकिने भएकाले बाँकी इहाजिरीको काम तत्काल सक्न आग्रह गरिएको थियो।
विद्यालयहरूको भौतिक पूर्वाधार विकासका लागि पूर्वाधार सर्वेक्षणका काम भइरहेको छ । चालु आर्थिक वर्षमा यसका लागि ३६ करोड रुपैयाँ विनियोजन गरिएको छ।
शिक्षा विभागका प्रमुख ढकालका अनुसार पहिलो चरणमा ४ र दोस्रो चरणमा ११ वटा विद्यालयको पूर्वाधार गुरुयोजना तयार भएको छ। तेस्रो चरणमा २३ वटा विद्यालयहरूको विस्तृत परियोजना प्रतिवेदन तयारी गर्ने कार्य भइरहेको छ।
