खुस्बु ओलीले उठाईन इन्टर्न चिकित्सकको माग

समाचार

गृहपृष्ठ
समाचार

खुस्बु ओलीले उठाईन इन्टर्न चिकित्सकको माग

ईडीयू सवाल सोमबार, असार २२, २०८३

काठमाडौँ - राष्ट्रिय प्रजातन्त्र पार्टी (राप्रपा) की प्रमुख सचेतक खुश्बु ओलीले चिकित्सा शिक्षण संस्थामा अध्ययनरत एमबीबीएस तथा बीडीएस इन्टर्न चिकित्सकहरूले भोग्दै आएको न्यून पारिश्रमिक, लामो कार्यघण्टा र श्रम शोषणको विषयमा सरकारको ध्यानाकर्षण गराएकी छन्।

सोमबार प्रतिनिधिसभा बैठकमा बोल्दै ओलीले सरकारी मेडिकल कलेजको तुलनामा निजी मेडिकल कलेजमा इन्टर्न चिकित्सकले निकै कम भत्तामा अत्यधिक समय काम गर्नुपर्ने अवस्था रहेको बताइन्। विभिन्न चिकित्सा शिक्षण संस्थामा न्यूनतम मापदण्डभन्दा कम इन्टर्नसिप भत्ता दिइएको र लामो समय काम गर्न बाध्य पारिएको भन्दै यसबारे निरन्तर गुनासो आइरहेको उनले उल्लेख गरिन्।

उनले नीतिगत कमजोरीका कारण उदाउँदा चिकित्सकहरूको श्रम शोषण भइरहेको र यही अवस्थाले दक्ष जनशक्ति विदेश पलायन हुने क्रम बढाएको बताइन्। समयमै सुधार नगरे भविष्यमा नेपालले चिकित्सक तथा अन्य स्वास्थ्यकर्मीको गम्भीर अभावको सामना गर्नुपर्ने जोखिम रहेको उनको भनाइ थियो। ओलीका अनुसार विभिन्न अध्ययन तथा कार्यदलले इन्टर्न चिकित्सकलाई आठौँ तहको प्रारम्भिक तलबमानको ५० प्रतिशत बराबर निर्वाह भत्ता उपलब्ध गराउन सिफारिस गरेका छन्। तर, करिब ९० दिनअघि प्रतिवेदन चिकित्सा शिक्षा आयोगमा पुगे पनि आवश्यक निर्णय र कार्यान्वयन प्रक्रिया अझै अघि बढ्न सकेको छैन।

उनले नेपालको श्रम ऐन, २०७४ ले तोकेको कार्यघण्टा र न्यूनतम पारिश्रमिकको व्यवस्था इन्टर्न चिकित्सकको हकमा प्रभावकारी रूपमा लागू नभएको भन्दै समान कामका लागि समान पारिश्रमिक र मर्यादित कार्यघण्टा सुनिश्चित गर्न सरकारसँग माग गरिन्।

सरकारबाट पटक-पटक आश्वासन आए पनि ठोस निर्णय नआएको उल्लेख गर्दै ओलीले इन्टर्न चिकित्सकहरूले आफ्ना माग पूरा गराउन आउँदो शनिबारदेखि संगठनात्मक रूपमा शान्तिपूर्ण प्रदर्शन गर्ने घोषणा गरिसकेको जानकारी पनि प्रतिनिधिसभालाई गराइन्।

प्रकाशित मिति: सोमबार, असार २२, २०८३ १२:५६