नवलपरासीमा छात्रालाई अश्लील म्यासेज पठाएको आरोपमा निजी विद्यालय सञ्चालक पक्राउ

समाचार

गृहपृष्ठ
समाचार

नवलपरासीमा छात्रालाई अश्लील म्यासेज पठाएको आरोपमा निजी विद्यालय सञ्चालक पक्राउ

ईडीयू सवाल आइतबार, साउन ३१, २०८३

नवलपरासी- नवलपरासीको सुस्ता गाउँपालिका–१ सिङ्हास्थित न्यू लाइफ इङ्लिस स्कुलका सञ्चालक ४६ वर्षीय भरत न्यौपाने बाल यौन दुर्व्यवहारको आरोपमा पक्राउ परेका छन्। विद्यालयमा कक्षा ९ मा अध्ययनरत १५ वर्षीया छात्रालाई करिब पाँच–छ महिनादेखि पटक–पटक अश्लील म्यासेज पठाउँदै मानसिक तनाव दिएको आरोपमा न्यौपानेलाई प्रहरीले पक्राउ गरेको हो।

पीडित छात्राले आफूलाई यौन प्रस्तावसमेत राखिएको भन्दै साथी र अभिभावकलाई जानकारी गराएपछि न्यौपानेविरुद्ध इलाका प्रहरी कार्यालय बेलाटारीमा जाहेरी परेको थियो। जाहेरीका आधारमा प्रहरीले उनलाई पक्राउ गरेको जिल्ला प्रहरी कार्यालयका सूचना अधिकारी डीएसपी मदन थापाले जानकारी दिए। प्रहरीका अनुसार न्यौपानेलाई अदालतबाट म्याद थप गरी घटनाबारे थप अनुसन्धान भइरहेको छ।

न्यौपानेमाथि यसअघि पनि सोही विद्यालयकी अर्की छात्रासँग यस्तै व्यवहार गरेको आरोप लागेको थियो। विद्यालयबाहिरसमेत उनले यस्तै गतिविधि गरेको र विगतमा पाँच–छ पटकसम्म यस्ता घटना भएको दाबी विद्यालयका एक शिक्षकले गरेका छन्।

यस विषयमा विगतमा भएका घटनाहरू आपसी रूपमा मिलाउने गरिएको बताइए पनि पछिल्लो घटनामा पीडित पक्षले प्रहरीमा जाहेरी दिएपछि सञ्चालक पक्राउ परेका हुन्। न्यौपानेमाथि यसअघि पनि यस्तै व्यवहार गरेको सुन्नमा आएको डीएसपी थापाले बताएका छन्।

प्रकाशित मिति: आइतबार, साउन ३१, २०८३ १३:४३