विद्यालयका सवारीसाधनमा १५ दिनभित्र गति नियन्त्रण गर्ने उपयुक्त प्रविधि जडान गर्न निर्देशन

विद्यालय

गृहपृष्ठ
विद्यालय

विद्यालयका सवारीसाधनमा १५ दिनभित्र गति नियन्त्रण गर्ने उपयुक्त प्रविधि जडान गर्न निर्देशन

ईडीयू सवाल सोमबार, भदौ १, २०८३

काठमाडौँ- चितवनमा विद्यालयका सवारीसाधनलाई सुरक्षित, अनुशासित र प्रविधिमैत्री बनाउँदै दुर्घटनाको जोखिम घटाउन गति नियन्त्रण उपकरण जडान अनिवार्य गरिने भएको छ। जिल्ला प्रशासन कार्यालयमा प्रमुख जिल्ला अधिकारी गणेश अर्यालको संयोजकत्वमा आइतबार बसेको सामुदायिक तथा संस्थागत विद्यालयका सवारीसाधन व्यवस्थापन, नियमन तथा दुर्घटना न्यूनीकरणसम्बन्धी समन्वय बैठकले विद्यार्थी बोक्ने सबै विद्यालय सवारीसाधनको अधिकतम गति प्रतिघण्टा ४० किलोमिटर कायम गर्ने निर्णय गरेको हो।

बैठकले विद्यालयका सवारीसाधनमा १५ दिनभित्र गति नियन्त्रण गर्ने उपयुक्त प्रविधि जडान गर्न निर्देशन दिएको छ। जडान गरिएको प्रविधिको अनुगमन जिल्ला ट्राफिक प्रहरी कार्यालय र जिल्ला प्रहरी कार्यालय चितवनले गर्नेछन्। प्रमुख जिल्ला अधिकारी अर्यालका अनुसार तोकिएको समयभित्र गति नियन्त्रण उपकरण जडान नगर्ने विद्यालय सवारीसाधन सञ्चालनमा रोक लगाइनेछ।

विद्यालयका सवारीसाधनको नियमित यान्त्रिक परीक्षण गर्नुपर्ने, चालक तथा सहचालकलाई समय–समयमा अनुशिक्षण दिनुपर्ने र मादक पदार्थ सेवन नियन्त्रणका उपाय प्रभावकारी बनाउनुपर्ने निर्णयसमेत बैठकले गरेको छ। विद्यालयले चालकलाई जिम्मेवारी दिनुअघि दैनिक मादक पदार्थ सेवन (मापसे) परीक्षण गर्नुपर्ने र परीक्षणको अभिलेख अनिवार्य रूपमा राख्नुपर्ने व्यवस्था मिलाउनुपर्नेछ।

बैठकमा जिल्ला सुरक्षा प्रमुख, शिक्षा विकास तथा समन्वय एकाइका प्रमुख, स्थानीय तहका शिक्षा शाखा प्रमुख, सामुदायिक तथा संस्थागत विद्यालयका प्रधानाध्यापक एवं प्रतिनिधि, शिक्षक, प्राविधिक कम्पनीका प्रतिनिधि तथा शिक्षा क्षेत्रका अन्य सरोकारवालाको सहभागिता रहेको थियो।

प्रकाशित मिति: सोमबार, भदौ १, २०८३ १२:५०