९२ निजी विद्यालयको अनुमति रद्द गर्ने कामपाकाे तयारी, ३५ दिनभित्र विवरण पेस गर्न सूचना

विद्यालय

गृहपृष्ठ
विद्यालय

९२ निजी विद्यालयको अनुमति रद्द गर्ने कामपाकाे तयारी, ३५ दिनभित्र विवरण पेस गर्न सूचना

ईडीयू सवाल आइतबार, भदौ ७, २०८३

काठमाडौँ - काठमाडौं महानगरपालिकाको शिक्षा विभागले महानगर क्षेत्रभित्र सञ्चालित ९२ वटा संस्थागत (निजी) विद्यालयको अनुमति वा स्वीकृति रद्द गर्ने प्रक्रिया अघि बढाएको छ। विभागले प्रचलित कानुनबमोजिम अनुमति वा स्वीकृति लिएर सञ्चालनमा रहेका तर हाल अनुमति वा स्वीकृति रद्द गर्नुपर्ने अवस्थामा पुगेका विद्यालयलाई ३५ दिनभित्र आवश्यक कागजातसहित आफ्नो विवरण पेस गर्न सूचना जारी गरेको हो।

शिक्षा विभागका प्रमुख नवराज ढकालका अनुसार शिक्षा ऐन, २०७५ को दफा ३६ बमोजिम विद्यालयको अनुमति वा स्वीकृति रद्द गर्नुपर्ने अवस्था देखिएकाले सम्बन्धित विद्यालयलाई आफ्नो पक्षसहित आवश्यक कागजात पेस गर्न समय दिइएको हो। तोकिएको अवधिभित्र चित्तबुझ्दो जवाफ वा आवश्यक प्रमाण पेस नभएमा सम्बन्धित विद्यालयको अनुमति वा स्वीकृति रद्द गर्ने प्रक्रिया अघि बढाइने ढकालले बताए।

यसअघि पनि काठमाडौं महानगरपालिकाले दर्ता भएर सञ्चालनमा नरहेका संस्थागत विद्यालयको स्थलगत अनुगमन गरी अनुमति खारेजीको प्रक्रिया अघि बढाउने निर्णय गरेको थियो। नगर शिक्षा समितिको बैठकले कागजमा मात्र सीमित रहेका तथा व्यवहारमा सञ्चालनमा नरहेका विद्यालयको अनुमति खारेज गर्ने प्रक्रिया अघि बढाउने निर्णय गरेको हो।

महानगरपालिकाले संस्थागत विद्यालयको सञ्चालनसँगै कक्षा तथा विषय थप, विद्यालयको नाम र स्थान परिवर्तन, स्वामित्व परिवर्तनलगायत विषयमा समेत प्रचलित कानुन तथा निर्धारित मापदण्डअनुसार प्रक्रिया अघि बढाउँदै आएको जनाएको छ।

प्रकाशित मिति: आइतबार, भदौ ७, २०८३ १३:२२