सडक आन्दोलनको क्षति बिदामा पूर्ति गर्न शिक्षक तथा कर्मचारीलाई महासंघकाे निर्देशन

शिक्षक

गृहपृष्ठ
शिक्षक

सडक आन्दोलनको क्षति बिदामा पूर्ति गर्न शिक्षक तथा कर्मचारीलाई महासंघकाे निर्देशन

ईडीयू सवाल आइतबार, वैशाख २८, २०८२

काठमाडाैँ - शैक्षिक हडतालका क्रममा पठनपाठनमा परेको क्षति हिउँदे वा बर्खे विदामा पूर्ति गर्न नेपाल शिक्षक महासंघले शिक्षक तथा कर्मचारीलाई अनुरोध गरेको छ । महासंघले एक विज्ञप्ति जारी गर्दै शिक्षक/विद्यालयलाई यस्तो अनुरोध गरेको हो।

महासंघले विद्यालय शिक्षा ऐन माग गर्दै माघ २० गतेबाट ८९ दिन लामो शिक्षक-कर्मचारी आन्दोलन गरेको थियो। जसमध्ये गत चैत २० देखि वैशाख १७ गतेसम्म भने काठमाडौँ केन्द्रित सडक आन्दोलन गरेको थियो।

आन्दोलनका क्रममा आयोजना भएको आमशैक्षिक हडतालका कारण विद्यालयको भर्ना र पठनपाठन अवरुद्ध भएकाले विद्यार्थीमा पर्न गएको शिक्षण सिकाइको क्षतिलाई ध्यानमा राखी आफ्नो अनुकूलता अनुसार हिउँदे वा बर्खे बिदामा सो क्षतिको पूर्ति गर्न सबै प्रधानाध्यापक तथा शिक्षक, कर्मचारीलाई महासंघले अनुरोध गरेको छ।

आन्दोलनपछि विगतमा सहमति भई कार्यान्वयनमा नआएका विषय मन्त्रीपरिषद्बाट निर्णय मार्फत कार्यान्वयन गराएको महासंघले जनाएको छ।

असार १५ गतेभित्र विद्यालय शिक्षा विधेयक प्रतिनिधि सभाबाट पारित गर्ने सुनिश्चित भएको बताउँदै यो आन्दोलन अत्यन्त सफल र उपलब्धिमूलक भएको महासंघको ठहर छ।

विज्ञप्ति