मुगुका विपन्नलाई चिसो छल्न न्याना कपडा वितरण

विद्यार्थी

गृहपृष्ठ
विद्यार्थी

मुगुका विपन्नलाई चिसो छल्न न्याना कपडा वितरण

ईडीयू सवाल आइतबार, पुस ७, २०८१

काठमाडाैँ - चिसोले कष्टकर दिन कटाइरहेका मुगुका दलित बस्तीका नागरिक र विद्यार्थीलाई चिसो छल्न न्याना कपडा वितरण गरिएको छ।

मुगुमा कार्मारोङ गाउँपालिकाका-९ नेपाल राष्ट्रिय आधारभूत विद्यालय छायल र छायानाथ रारा नगरपालिका-१३ लापु गाउँका दलित समुदायसँगै उक्त गाउँमा रहेको नमूना आधारभूत विद्यालयमा अध्ययनरत विद्यार्थीलाई न्यानो कपडा तथा स्टेशनरी सामग्री सहयोग गरिएको छ। काठमाडौँको नागार्जुन नगरपालिका-१० साविकको स्युचाटारका शविकुमार पन्त र मुगुमा क्रियाशील सञ्चारकर्मी नन्दबहादुर रोकायाको समन्वयमा यस सहयोग वितरण गरिएको हाे।

पन्तले मुगुमा कार्माराङ-९ नेपाल राष्ट्रिय आधारभूत विद्यालय छायलमा पुगी १२८ विद्यार्थीलाई न्यानो कपडा वितरणसँगै छायानाथ रार-१३ लापु दलित बस्ती र लापुमै रहेको नमूना आधारभूत विद्यालयमा अध्ययनरत ३० विद्यार्थीलाई न्यानो कपडा सहयोग प्रदान गरेका हुन्।

लापु गाउँको दलित बस्ती अवस्था र चिसोबाट मुगुका विद्यार्थीमा पठनपाठनमा समस्या भएको विभिन्न सञ्चारमाध्यमा समाचार आएपछि आफूलगायत वैदेशिक रोजगारीमा रहेका केही साथीको सहयोगमा विपन्न, दलित समुदाय र उनीहरूका विद्यालय जाने बालबालिकालाई न्यानो कपडा तथा स्टेशनरी सामग्री सहयोग गरेको उनले बताए।

प्रकाशित मिति: आइतबार, पुस ७, २०८१ १२:१७