हामी तत्काल आन्दोलनको पक्षमा छैनौँ : अध्यक्ष सुवेदी

शिक्षक

गृहपृष्ठ
शिक्षक

हामी तत्काल आन्दोलनको पक्षमा छैनौँ : अध्यक्ष सुवेदी

ईडीयू सवाल आइतबार, वैशाख १३, २०८३

काठमाडौँ- नेपाल शिक्षक महासंघका अध्यक्ष लक्ष्मीकिशोर सुवेदीले अहिलेको अवस्थामा हतारमा आन्दोलनमा जानु उचित नहुने बताएका छन्। उनले तत्काल आन्दोलन सुरु गर्दा त्यसले गलत अर्थ लिन सक्ने र आन्दोलनको दिशा नै बिग्रिन सक्ने भएकाले संयममित भएर अघि बढ्नुपर्ने उल्लेख गरेका छन्।

नेपाल विद्यालय कर्मचारी परिषद् राष्ट्रिय समितिको बैठकमा बोल्दै सुवेदीले शिक्षक तथा विद्यालय कर्मचारीका मागहरू विशेष गरी समान सेवा सर्त र सुविधा एकीकृत रूपमा उठाउनुपर्ने आवश्यकता औँल्याए। परिस्थिति राम्रोसँग मूल्याङ्कन नगरी हतारमा निर्णय लिए आन्दोलन उल्टै आफ्नै विरुद्ध जान सक्ने उनको भनाइ थियो।

अध्यक्ष सुवेदीले हालै नयाँ सरकार गठन भएको सन्दर्भमा शिक्षक तथा कर्मचारी आन्दोलनबारे विभिन्न आशंका र आरोपहरू उठिरहेको बताए। आफूहरू राजनीतिमा संलग्न भएको आरोप असत्य भएको स्पष्ट पार्दै उनले यस्तो अवस्थामा सडक आन्दोलनमा हतारिनु थप जटिलता निम्त्याउन सक्ने बताए।

उनले तत्काल आन्दोलनभन्दा आफ्ना मागहरू स्पष्ट रूपमा सार्वजनिक गर्ने रणनीतिमा अघि बढ्नुपर्नेमा जोड दिए। शिक्षा ऐन कस्तो हुनुपर्छ भन्ने विषयमा ठोस प्रस्ताव सार्वजनिक गरेर सरकारलाई जानकारी गराउने र त्यसमार्फत दबाब सिर्जना गर्ने योजना रहेको उनले बताए।

कार्यक्रममा नेपाल शिक्षक महासंघका महासचिव तुलाबहादुर थापा, शिक्षक संघका अध्यक्ष सोमनाथ गिरी, नेपाल राष्ट्रिय शिक्षक संगठनका अध्यक्ष हंसबहादुर शाही, अखिल नेपाल शिक्षक संगठनका अध्यक्ष लक्षीराम ढकाल तथा संस्थागत विद्यालय शिक्षक युनियनका महासचिव भूपाल उप्रेती लगायतको उपस्थिति रहेको थियो।

प्रकाशित मिति: आइतबार, वैशाख १३, २०८३ १२:५४