बजेटले अस्थायी शिक्षक तथा कर्मचारीमा थप निराशा उत्पन्न गरेको महासंघको ठहर

समाचार

गृहपृष्ठ
समाचार

बजेटले अस्थायी शिक्षक तथा कर्मचारीमा थप निराशा उत्पन्न गरेको महासंघको ठहर

ईडीयू सवाल शुक्रबार, जेठ २२, २०८३

काठमाडौँ- नेपाल अस्थायी शिक्षक तथा कर्मचारी महासंघ राष्ट्रिय समितिले सरकारले आर्थिक वर्ष २०८३/०८४ का लागि प्रस्तुत गरेको बजेट तथा कार्यक्रमप्रति गम्भीर ध्यानाकर्षण भएको जनाएको छ।

महासंघले शिक्षकको तलब वृद्धि तथा महँगी भत्ताबाहेक थप गरिएको प्रोत्साहन भत्ताको व्यवस्थालाई सकारात्मक रूपमा स्वागत गरे पनि विद्यालय शिक्षा क्षेत्रका विभिन्न माग र समस्याहरू सम्बोधन गर्न बजेट असफल भएको आरोप लगाएको छ। महासंघले शुक्रबार जारी गरेको प्रेस विज्ञप्तिमा निर्वाचनका क्रममा गरिएका प्रतिबद्धताअनुसार विद्यालय शिक्षाका लागि पर्याप्त बजेट विनियोजन नभएको उल्लेख गरेको छ।

विज्ञप्तिमा लामो समयदेखि कार्यरत अस्थायी प्रकृतिका शिक्षक तथा विद्यालय कर्मचारीका लागि योगदानमा आधारित सामाजिक सुरक्षा, न्यून वेतनमा कार्यरत करार तथा राहत शिक्षक र विद्यालय कर्मचारीका समस्या समाधानतर्फ बजेट मौन रहेको जनाइएको छ।

महासंघका अनुसार गत वर्षको बजेटमा समेटिएका अस्थायी शिक्षकसम्बन्धी केही प्रस्तावहरू समेत यसपटक हटाइएको छ, जसले अस्थायी शिक्षक तथा कर्मचारीमा थप निराशा उत्पन्न गरेको छ।
यस्तै, विद्यालय कर्मचारी, बाल विकास शिक्षक तथा शिक्षण सिकाइ अनुदानमा कार्यरत शिक्षकहरूले सुरु गरेको आन्दोलनप्रति महासंघले पूर्ण ऐक्यबद्धता जनाएको छ। महासंघले सरकारलाई आन्दोलनरत पक्षका जायज माग तत्काल सम्बोधन गर्न र बजेटमा आवश्यक संशोधन गर्न आग्रह गरेको छ। महासंघका संयोजक विष्णु खत्रीद्धारा हस्ताक्षरीत विज्ञप्तिमा देशभरका शिक्षक तथा कर्मचारीलाई बजेट वक्तव्यको गम्भीर अध्ययन गरी आन्दोलनका कार्यक्रमलाई थप सशक्त बनाउन समेत आह्वान गरिएको छ।

महासंघले शिक्षा क्षेत्रमा कार्यरत अस्थायी शिक्षक तथा कर्मचारीका अधिकार, सेवा–सुविधा र सामाजिक सुरक्षाका विषयलाई प्राथमिकतामा राखेर बजेट पुनरावलोकन गर्न सरकारसँग माग गरेको छ।