हेटौँडा उपमहानगरले अटिजम भएका बालबालिकाको लागि विद्यालय सञ्चालन गर्ने

बालबालिका

गृहपृष्ठ
बालबालिका

हेटौँडा उपमहानगरले अटिजम भएका बालबालिकाको लागि विद्यालय सञ्चालन गर्ने

ईडीयू सवाल बुधबार, चैत २०, २०८१

काठमाडौँ - अटिजम भएका बालबालिकालाई लक्षित गर्दै हेटौँडा उपमहानगरपालिकाले विद्यालय सञ्चालन गर्ने भएको छ। विश्व अटिजम जनचेतना दिवसको अवसरमा आयोजित कार्यक्रममा नगर प्रमुख मीनाकुमारी लामाले उपमहानगरले हेटाैँडा- ११ मा विद्यालय सञ्चालनका लागि बजेट व्यवस्थापन गर्ने बताइन्।

उपमहानगरले महिलाहरुका लागि भवन निर्माणको काम गर्नका लागि डिपीसी समेत भैसकेको जमिनमा विद्यालय सञ्चालनको तयारी थालिएको उनले बताइन्। पछिल्लो समय अटिजम भएका बालबालिकाका अभिभावकले निजी क्षेत्रबाट सञ्चालन भएका विद्यालयबाट चर्को शुल्क असुलेको गुनासो गरीरहेको सन्दर्भमा अब सबै खालका परिवारलाई लक्षित गर्दै उपमहानगर आफैले बिद्यालय सञ्चालनको पाटो अघि बढेको उनले बताइन्।

हेटौँडा-४ मा रहेको सेन्टर फर अटिजममा अध्ययनरत बालबालिकाको अभिभावकसँगको अन्तरक्रिया कार्यक्रममा नगर प्रमुख लामाले अटिजम भएका बालबालिका र शारीरीक रुपमा अशक्त बालबालिकालाई एकै ठाउँमा राखेर हेर्ने प्रवृतिका कारण समस्या देखिएको बताइन्।

अहिले सेन्टर फर अटिजममा उपमहानगरपालिका क्षेत्रका ३२ जनाबालबालिका अध्यापन गर्दै आएका छन्। कार्यक्रममा अभिभावकले उपमहानगरले अटिजमको बिषयमा स्थानिय तह जिम्मेवार बन्न आवश्यक रहेको बताएका थिए।

प्रकाशित मिति: बुधबार, चैत २०, २०८१ १८:००