गाउँकाे पहलमा भार्से जनसहयोग माविमा ‘प्रविधी मैत्री शिक्षा अभियान’ सञ्चालन

प्राविधिक शिक्षा

गृहपृष्ठ
प्राविधिक शिक्षा

गाउँकाे पहलमा भार्से जनसहयोग माविमा ‘प्रविधी मैत्री शिक्षा अभियान’ सञ्चालन

ईडीयू सवाल शुक्रबार, कात्तिक १४, २०८२

काठमाडाैँ - गुल्मिकाे सत्यवति गाउँपालिकामा रहेकाे भार्से जनसहयोग माविमा विद्यार्थी टिकाउन ‘प्रविधी मैत्री शिक्षा अभियान’ सञ्चालन गरिएको छ। भार्से जनसहयोग माविमा पछिल्ला बर्षहरुमा बसाइसराइँका कारण विद्यार्थीको सङ्ख्या घट्दै गएपछि यस अभियान सञ्चालन गरिएको हो।

भार्सेमा शिक्षाकै कारण गाउँ छोड्न पर्ने र बालबालिकाहरुसँगै अभिभावकहरु पनि पलायन हुने अवस्थाको न्यूनीकरणका लागि भार्सेलीहरुले ‘प्रविधी मैत्री शिक्षा अभियान’ सञ्चालन गरेका हुन्। यस अभियानबाट ९ लाखभन्दा बढि रकम सहयोग संकलन गरेर प्राविधिक शिक्षा सुरु गरिएको छ।

अभियानबाट अहिले विद्यालयमा १९ वटा कम्प्युटर र एउटा कम्प्युटर शिक्षकको व्यवस्थापन गरेर पढाई सञ्चालन गरिएको भार्सेका अगुवा सुजन गलामीले जानकारी दिए। विद्यालयमा कक्षा ४ देखि ८ सम्म अध्ययन गर्ने ४०-४५ विद्यार्थीहरुलाई दैनिक ज्ञान र सीप प्रदान गर्ने उद्देश्यले छुट्टै कम्प्युटर कक्षाको व्यवस्था गरिएको गलामीले बताए। गलामीका अनुसार अभियानमा सहयोग गर्ने धेरै परदेशी भार्सेली रहेकाे र भार्सेबाट बसाइसराइँ गर्ने भार्सेलीहरुले पनि अभियानमा सहयोग गरिरहेका छन्।

यो अभियानमा भार्सेली लेफ्टिनेण्ट कुलबहादुर बुढाथोकी र सुवेदार मोतिबहादुर थापासहितका व्यक्तिहरुले नेतृत्व गरेर काम गरिरहेका छन्। एउटा कम्प्युटर प्रयोग गर्न तीन/चार जना एकै ठाउँ झुमिनुपर्ने र एसइईपछि कम्प्युटर सिक्न शहर जानुपर्ने बाध्यताको अन्त्य गर्न यस अभियानकाे सुरु गरिएकाे अभियान्ता कुलबहादुर बुढाथोकीले बताए। उनले अभियानलाई सहयोग र सहज बनाउने सवैप्रति आभार प्रकट गरे।

बसाइसराइँका कारण भार्से जनसहयोग माविलाई विद्यार्थी टिकाउन ठुलो चुनौति रहेको रहेको छ। सत्यावति गाउँपालिका-८ को वडा सचिव विद्या भण्डारीका अनुसार आर्थिक वर्ष २०८१/०८२ मा १९ परिवारका ५५ जना भार्से छोडेर बसाइँ सरेका छन्।

भार्से जनसहयोग माविका प्रध्यानाध्यापक लोकहरी पाण्डेयका अनुसार गत वर्ष १२० जना विद्यार्थी रहेका थिए। अहिले घटेर १०५ मा झरेको छ। एसइईपछि मात्रै नभएर सानो कक्षामा समेत विद्यार्थी बाहिर जान थालेकाे पाण्डेयले बताए। अहिले विद्यालयमा १८ जना शिक्षक तथा कर्मचारी र एक सय २० जना विद्यार्थी रहेका छन्।

प्रकाशित मिति: शुक्रबार, कात्तिक १४, २०८२ ११:५८