दमौलीमा देउसी भैलो खेलेर संकलित रकमबाट विपन्न परिवारका विद्यार्थीहरूलाई न्यानो कपडा वितरण

विद्यार्थी

गृहपृष्ठ
विद्यार्थी

दमौलीमा देउसी भैलो खेलेर संकलित रकमबाट विपन्न परिवारका विद्यार्थीहरूलाई न्यानो कपडा वितरण

ईडीयू सवाल शुक्रबार, कात्तिक १४, २०८२

काठमाडाैँ - दमौलीका महम्मद गफ्फार (सुदिप) र उनको समूहले तिहारमा देउसी भैलो खेलेर संकलन गरेको रकमबाट विपन्न परिवारका विद्यार्थीहरूलाई न्यानो कपडा सहयोग गरेका छन्। उनीहरूले व्यास नगरपालिका चिन्तुटारस्थित शुक्र आधारभूत विद्यालयमा अध्ययनरत ३० जना विपन्न विद्यार्थीलाई स्विटर, टोपी, मोजा लगायतका न्यानो कपडा वितरण गरेका हुन्।

देउसी-भैलो खेलेर संकलन गरिएको ७३ हजार रुपैयाँ रकमबाट यी सामग्रीहरू वितरण गरिएको हो गफ्फारले जानकारी दिए। उनले भने, 'विगतका वर्षहरूमा जस्तै यो वर्ष पनि न्यानो कपडा वितरण अभियान संचालन गरेर अन्य विद्यालयका विद्यार्थीहरूलाई पनि सहयोग गर्ने योजना छ।'

कार्यक्रमका प्रमुख अतिथि व्यास-५का वडा अध्यक्ष हिमाल श्रेष्ठले भने, 'मानव सेवा नै सबैभन्दा ठूलो धर्म हो। युवाहरुले तिहारमा देउसी-भैलो खेलेर विपन्न तथा जेहेन्दार विद्यार्थीहरूलाई सहयोग गरि प्रशंसनीय कार्य गरेको उल्लेख गर्दै यसले अरुलाई पनि सामाजिक काम गर्न प्रेरणा मिल्ने बताए।'

सो अवसरमा विद्यालयका प्रधानाध्यापक टीकाराम ढकालले देउसी-भैलो खेलेर संकलित रकमको सदुपयोग गरी विपन्न विद्यार्थीहरूलाई सहयोग गरेकोमा गफ्फार र उनकी टिमलाई धन्यवाद व्यक्त गरे। साथै न्यानो कपडाले जाडो महिनामा विद्यालय आउन र पठनपाठन गर्न विद्यार्थीहरूलाई सहज हुने विश्वास व्यक्त गरे।

सामाजिक अभियन्ता महम्मद गफ्फार र उनको समूहले हरेक वर्ष देउसी भैलोबाट संकलित रकमलाई सामाजिक सेवामा प्रयोग गर्दै आएका छन्।

प्रकाशित मिति: शुक्रबार, कात्तिक १४, २०८२ १२:०६