माग पूरा नगरी प्रहरी प्रशासन लगाएर ताला फोडेको भन्दै त्रिविका विद्यार्थी अनशनमा

विद्यार्थी

गृहपृष्ठ
विद्यार्थी

माग पूरा नगरी प्रहरी प्रशासन लगाएर ताला फोडेको भन्दै त्रिविका विद्यार्थी अनशनमा

ईडीयू सवाल मंगलबार, माघ १३, २०८२

काठमाडाैँ- त्रिभुवन विश्वविद्यालयका उपकुलपति, रजिष्ट्रार र शिक्षाध्यक्षको कार्यकक्ष अगाडि विद्यार्थी संगठन अखिल क्रान्तिकारीले रिले अनशन सुरु गरेका छन्। आफ्नो माग पूरा नगरी प्रहरी प्रशासन लगाएर ताला खोलेको भन्दै माग पूरा नहुँदासम्म रिले अनशन जारी राख्ने अखिल क्रान्तिकारीका त्रिवि जिल्ला समितिका अध्यक्ष दिनेश ऐरले बताए। विद्यार्थीहरुले लगाएको ताला २५ दिनपछि विश्वविद्यालयले सोमबार प्रहरी प्रशासन लगाएर खोलेको थियो।

त्रिविका अन्तर्राष्ट्रिय सम्बन्ध तथा कूटनीति, लैङ्गिक अध्ययन, सामाजिक कार्य र द्वन्द्व शान्ति तथा विकास अध्ययन गरी चार केन्द्रीय विभागको शुल्क समायोजन गर्नुपर्ने विद्यार्थीहरूको माग छ। यही माग राखेर विद्यार्थीहरूले गएको असारमा पनि धर्ना र तालाबन्दी गरेका थिए। एक महिनाभन्दा लामो धर्ना र आन्दोलनपछि आन्दोलनरत विद्यार्थी र विश्वविद्यालयबीच चार विभागको शुल्क १ लाख १० हजार निर्धारण गर्ने गरी सहमति भएको थियो।

तर, पूर्व सहमति नभएको भन्दै विद्यार्थीहरूले फेरि गएको १८ पुसमा उपकुलपति, रजिष्ट्रार र शिक्षाध्यक्षको कार्यकक्षमा तालाबन्दी गरेका थिए। आफ्नो माग सम्बोधनका विषयमा कुनै छलफल र निर्णय नगरी ताला खोलेको भन्दै उनीहरूले सोमबार साँझ मसाल जुलुस निकालेका थिए। मंगलबारदेखि भने माग पूरा नहुँदासम्म उपकुलपति, रजिष्ट्रार र शिक्षाध्यक्षको कार्यकक्ष अगाडि रिले अनशन बस्ने अध्यक्ष ऐरले बताए।

प्रकाशित मिति: मंगलबार, माघ १३, २०८२ १८:२२