जुम्लामा एसईई परीक्षार्थी संख्या घट्दो, यस वर्ष २ हजार २५५ विद्यार्थी सहभागी हुने

समाचार

गृहपृष्ठ
समाचार

जुम्लामा एसईई परीक्षार्थी संख्या घट्दो, यस वर्ष २ हजार २५५ विद्यार्थी सहभागी हुने

ईडीयू सवाल बिहीबार, चैत ५, २०८२

काठमाडाैँ - यस वर्षको माध्यमिक शिक्षा परीक्षा (एसईई) मा जुम्लाबाट कुल २ हजार २ सय ५५ जना विद्यार्थी सहभागी हुने भएका छन्। शिक्षा विकास तथा समन्वय इकाइ जुम्लाका अनुसार तीमध्ये २ हजार १ सय ३३ जना नियमिततर्फ र १ सय २२ जना ग्रेडवृद्धितर्फका परीक्षार्थी रहेका छन्।

अघिल्लो वर्षको तुलनामा यस वर्ष परीक्षार्थी संख्या उल्लेख्य रूपमा घटेको देखिएको छ। गत वर्ष २ हजार ६ सय ८१ विद्यार्थी सहभागी भएकामा अहिले ४ सय २६ ले कमी आएको हो। पछिल्ला केही वर्षको तथ्याङ्कले पनि जुम्लामा एसईई दिने विद्यार्थी संख्या क्रमशः घट्दै गएको संकेत गर्छ।

इकाइका अनुसार २०७९ मा २ हजार ८ सय ७७ जना परीक्षार्थी रहेकामा २०८० मा त्यो संख्या २ हजार ५ सय ५७ मा झरेको थियो। २०८१ मा केही वृद्धि भएर २ हजार ६ सय ८१ पुगे पनि यस वर्ष फेरि घट्दै २ हजार २ सय ५५ मा सीमित भएको छ। चार वर्षको अवधिमा कुल ६ सय २२ विद्यार्थीले कमी आएको तथ्याङ्कले देखाउँछ।

परीक्षार्थी घट्नुका प्रमुख कारणमा बसाइँसराइ, विद्यालय उमेर समूहको जनसंख्या कमी हुनु तथा बीचमै पढाइ छोड्ने प्रवृत्ति रहेको बताइएको छ। यद्यपि प्राविधिक धार र खुला विद्यालयतर्फ विद्यार्थीको सहभागिता भने सकारात्मक रूपमा बढिरहेको छ।

यस वर्ष जुम्लामा एसईई सञ्चालनका लागि १४ वटा परीक्षा केन्द्र तोकिएका छन्। विभिन्न माध्यमिक विद्यालयहरूमा केन्द्र निर्धारण गरी विद्यार्थीलाई परीक्षा दिने व्यवस्था मिलाइएको छ। त्यसैगरी, प्राविधिक धारतर्फ १ सय ३० जना विद्यार्थी र खुला विद्यालयतर्फ १७ जना परीक्षार्थी सहभागी हुनेछन्। यस वर्षको एसईई परीक्षा चैत १९ गतेदेखि २९ गतेसम्म सञ्चालन हुने तालिका रहेको छ।

प्रकाशित मिति: बिहीबार, चैत ५, २०८२ १६:१०