एसईई दिएका विद्यार्थीहरूलाई लक्षित गर्दै एनसेलको ‘पहिलो सिम’ विशेष अफर

विद्यार्थी

गृहपृष्ठ
विद्यार्थी

एसईई दिएका विद्यार्थीहरूलाई लक्षित गर्दै एनसेलको ‘पहिलो सिम’ विशेष अफर

ईडीयू सवाल आइतबार, वैशाख ६, २०८३

काठमाडौँ- एनसेलले माध्यमिक शिक्षा परीक्षा (एसईई) दिएका विद्यार्थीहरूलाई लक्षित गर्दै ‘पहिलो सिम’ विशेष अफर सार्वजनिक गरेको छ। यस योजनाअन्तर्गत विद्यार्थीहरूले करसहित मात्र ५० रुपैयाँमा एनसेलको प्रिपेड सिम प्राप्त गर्न सक्नेछन्।

यो अफरमार्फत विद्यार्थीहरूले विभिन्न आकर्षक बन्डल सेवाहरूको सुविधा पनि लिन पाउनेछन्। ‘पहिलो सिम’ लिँदा आफूलाई मनपर्ने मोबाइल नम्बर छनोट गर्ने सुविधा समेत दिइएको छ।यस सिममा २ जीबी डेटा, सबै नेटवर्कमा कल गर्न मिल्ने ५० मिनेट टक टाइम, साथै ‘मेरो स्कुल’ र ‘गेमिङ प्रिमियर लिग (जीपीएल)’ जस्ता सेवाहरू २८ दिनका लागि निःशुल्क उपलब्ध हुनेछन्।

‘मेरो स्कुल’ एक डिजिटल लर्निङ प्लेटफर्म हो, जहाँ पाठ्यक्रमअनुसार विभिन्न भिडियो सामग्रीमार्फत अनलाइन अध्ययन गर्न सकिन्छ। त्यस्तै, जीपीएल एक गेमिङ पोर्टल हो, जसमा एचटीएमएलमा आधारित विभिन्न खेलहरू खेल्न सकिन्छ।

यसका साथै, ‘पहिलो सिम’ प्रयोगकर्ताहरूले डिजिटल वालेट ‘खल्ती’ प्रयोग गर्दा डेटा शुल्क नलाग्ने सुविधा पनि पाउनेछन्। ५० रुपैयाँ वा सोभन्दा बढी रिचार्ज गर्दा ७ दिनसम्म मान्य ५०० एमबी बोनस डेटा समेत उपलब्ध हुनेछ।

कम्पनीका अनुसार एसईई दिएका विद्यार्थीहरूले देशभरका एनसेल सेन्टरबाट सहज रूपमा यो सिम लिन सक्नेछन्। सिम लिनका लागि विद्यार्थीहरूले आफ्नो एसईई प्रवेशपत्र र आमा वा बाबुको नागरिकताको फोटोकपीसहित नजिकको एनसेल सेन्टरमा उपस्थित हुनुपर्नेछ। आवश्यक प्रमाणीकरणपछि सिम सक्रिय गरिनेछ।

प्रकाशित मिति: आइतबार, वैशाख ६, २०८३ ११:३३