सार्वजनिक यातायातमा विद्यार्थीलाई ४५ प्रतिशत छुट अनिवार्य गर्न निर्देशन

विद्यार्थी

गृहपृष्ठ
विद्यार्थी

सार्वजनिक यातायातमा विद्यार्थीलाई ४५ प्रतिशत छुट अनिवार्य गर्न निर्देशन

ईडीयू सवाल बुधबार, वैशाख ९, २०८३

काठमाडौँ- सरकारले सार्वजनिक यातायातमा विद्यार्थीलाई कानुनअनुसार दिइँदै आएको ४५ प्रतिशत भाडा छुट अनिवार्य रूपमा लागू गर्न निर्देशन दिएको छ। भौतिक पूर्वाधार तथा यातायात मन्त्रालयअन्तर्गतको यातायात व्यवस्था विभागले यातायात व्यवसायीहरूलाई पत्राचार गर्दै उक्त सहुलियत प्रभावकारी रूपमा कार्यान्वयन गर्न ताकेता गरेको हो।

विभागका अनुसार २०६५ फागुन २० गते सरकार र यातायात व्यवसायीबीच भएको सहमतिअनुसार विद्यार्थीहरूले सार्वजनिक सवारी साधनमा ४५ प्रतिशत भाडा छुट पाउने व्यवस्था छ। तर पछिल्लो समय धेरै सवारी साधनले उक्त सुविधा नदिएको भन्दै ‘हेलो सरकार’ तथा विभागको गुनासो पेटिकामा व्यापक उजुरी परेपछि विभागले पुनः ध्यानाकर्षण गराएको हो।

विभागका निर्देशक गणेशमान सिंह राईद्वारा जारी पत्रमा नेपाल यातायात व्यवसायी राष्ट्रिय महासंघ, सार्वजनिक यातायात केन्द्रीय महासंघ र साझा यातायातलाई सम्बोधन गर्दै विद्यार्थी सहुलियतलाई कडाइका साथ लागू गर्न आग्रह गरिएको छ। निर्देशनको अवहेलना गर्ने सवारी साधनलाई कानुनी कारबाही गरिने विभागले चेतावनी दिएको छ।