कम विद्यार्थी भएका व्यास गाउँपालिकाका छ विद्यालय समायोजन

विद्यालय

गृहपृष्ठ
विद्यालय

कम विद्यार्थी भएका व्यास गाउँपालिकाका छ विद्यालय समायोजन

ईडीयू सवाल आइतबार, जेठ १७, २०८३

काठमाडौँ- विद्यार्थी सङ्ख्या न्यून भएपछि दार्चुलाको व्यास गाउँपालिकाले छ वटा विद्यालय समायोजन गरेको छ। सरकारको सार्वजनिक विद्यालय समायोजन (मर्ज) नीति अनुरूप गाउँ शिक्षा समिति र पालिकाको विद्यालय समायोजन गर्ने निर्णय अनुसार विद्यार्थी न्यून भएका विद्यालयलाई समायोजन गरिएको गाउँपालिकाका उपाध्यक्ष विनोदसिंह कुँवरले जानकारी दिए।

गाउँपालिका शिक्षा शाखाका प्राविधिक सहायक नरेन्द्रसिंह बडालका अनुसार हुस्कर आधारभूत विद्यालय डोकट र ब्रहम आधारभूत विद्यालय डोबलाई सम्पाल माध्यमिक विद्यालय सुन्सेरामा समायोजन गरिएको छ। डोकटमा आठ र डोबमा सात जना मात्रै विद्यार्थी भएपछि विद्यालय समायोजन गरिएको उनले बताए। पालिकास्थित लट्बाब आधारभूत विद्यालय जयपुरमा आठ र मालिकार्जुन आधारभूत विद्यालय पन्तोलीमा सात जना विद्यार्थी रहेकामा सो विद्यालयलाई हिमालय माध्यमिक विद्यालय हुतीमा समायोजन गरिएको छ।

समायोजन गरिएका चार वटै आधारभूत विद्यालयमा बालविकास कक्षा यथावत् राखिएको तथा नियमित रूपमा कक्षा सञ्चालन भइरहेको छ। यसैगरी महादेव आधारभूत विद्यालय तुसारपानीलाई सिद्ध माध्यमिक विद्यालय सिनामा तथा हुस्कर आधारभूत विद्यालयलाई वसन्तपुर माध्यमिक विद्यालय बसेडीमा समायोजन गरिएको प्राविधिक सहायक बडालले जानकारी दिए।

विद्यालय समायोजनपछि विद्यार्थीलाई आवतजावतमा सहज भएको तथा माथिल्लो योग्यता भएका शिक्षकलाई माध्यमिक विद्यालयमा खटाउन सजिलो भएको गाउँपालिकाका उपाध्यक्ष कुँवरले बताए।

प्रकाशित मिति: आइतबार, जेठ १७, २०८३ १३:५१