निजी विद्यालयमा ३ प्रतिशत कर लगाउने प्रावधानप्रति अभिभावक संघको गम्भीर आपत्ती

विद्यालय

गृहपृष्ठ
विद्यालय

निजी विद्यालयमा ३ प्रतिशत कर लगाउने प्रावधानप्रति अभिभावक संघको गम्भीर आपत्ती

ईडीयू सवाल सोमबार, जेठ १८, २०८३

काठमाडौँ- नेपाल राष्ट्रिय अभिभावक संघले आगामी आर्थिक वर्ष २०८३/८४ को बजेटमार्फत निजी विद्यालयलाई ‘शिक्षा समता शुल्क’ शीर्षकमा अतिरिक्त शुल्क उठाउने व्यवस्था गरिएको भन्दै गम्भीर आपत्ति जनाएको छ।

संघले सोमबार जारी गरेको प्रेस विज्ञप्तिमा सरकारले निजी क्षेत्रबाट सञ्चालित शैक्षिक संस्थाहरूलाई ‘शिक्षा समता शुल्क’ का नाममा शुल्क उठाउन दिने व्यवस्था गरेको उल्लेख गर्दै त्यसको भार अन्ततः अभिभावकको काँधमा पर्ने भन्दै चिन्ता व्यक्त गरेको छ।
संघले हाल निजी विद्यालयहरूले शैक्षिक सत्र २०८३ का लागि वार्षिक, मासिक तथा अन्य विभिन्न शीर्षकमा शुल्क निर्धारण गरिसकेको अवस्थामा थप ३ प्रतिशत ‘शिक्षा समता शुल्क’ उठाइए त्यसको व्यवस्थापन कसरी हुने र यसको असर अभिभावकमाथि पर्ने वा नपर्ने विषयमा सरकारले स्पष्ट धारणा सार्वजनिक गर्नुपर्ने माग समेत गरेको छ।

विज्ञप्तिमा सरकारले निजी विद्यालयहरूबाट संकलन गर्ने भनिएको उक्त शुल्क विद्यालय व्यवस्थापनले आफ्नै स्रोतबाट व्यहोर्ने कि अभिभावकबाट असुल गरिने भन्ने विषय अझै अस्पष्ट रहेको उल्लेख गरिएको छ। संघले ३ प्रतिशत शुल्कको भार अभिभावकमाथि थोपर्ने प्रयास भए त्यसप्रति आफ्नो गम्भीर असहमति रहने चेतावनी दिएको छ।

साथै संघले यस विषयमा देशभरका अभिभावक तथा सरोकारवालाहरूलाई सचेत र सजग रहन आग्रह गरेको छ। संघका राष्ट्रिय अध्यक्ष कोष बहादुर जिसीद्वारा हस्ताक्षरित विज्ञप्तिमा शिक्षा क्षेत्रमा कुनै पनि नयाँ शुल्क लागू गर्दा अभिभावकको हितलाई प्राथमिकतामा राख्न सरकारसँग माग गरिएको छ।

संघले आफू देशभरका करिब ५० लाख अभिभावकको प्रतिनिधिमूलक संस्था भएको दाबी गर्दै शिक्षा क्षेत्रमा सुधार, अभिभावक अधिकारको संरक्षण तथा गुणस्तरीय शिक्षाका लागि निरन्तर आवाज उठाउँदै आएको जनाएको छ।