शिक्षकका माग सम्बोधनमा हामी पनि गम्भीर छाैँ : सभापति देउवा

समाचार

गृहपृष्ठ
समाचार

शिक्षकका माग सम्बोधनमा हामी पनि गम्भीर छाैँ : सभापति देउवा

ईडीयू सवाल शुक्रबार, चैत २९, २०८१

काठमाडाैँ - नेपाली कांग्रेसका सभापति शेरबहादुर देउवाले शिक्षकका माग सम्बोधनमा पार्टी गम्भीर रहेको बताएका छन्। कांग्रेस शिक्षा विभाग प्रमुख नैनसिंह महरसहित शिक्षक सङ्घका प्रदेश अध्यक्षहरूसँगको छलफलमा सभापति देउवाले शिक्षकका माग सम्बोधनमा कांग्रेस गम्भीर रहेको बताएका हुन्।

सभापति देउवाले शिक्षा ऐन जारी गर्ने विषयमा प्रधानमन्त्री केपी शर्मा ओली र सत्तारुढ दल एमालेसँग आफूले निरन्तर छलफल गरिरहेको जानकारी दिए।

शिक्षा विभाग प्रमुख महरले कांग्रेस शिक्षकको साथमा रहेको भनाइ राखे। उनले भने, ‘शिक्षकहरूका माग सम्बोधन गर्नेबारे सभापति देउवाले मलगायत शिक्षक प्रतिनिधिहरूसँग छलफल गर्नुभएको हो। उहाँ यो विषयमा निकै गम्भीर हुनुहुन्छ। शिक्षा ऐन जारी हुनुपर्छ भन्नेमा पार्टी दृढ छ।’

सभापति देउवासँगको शिक्षकहरूको छलफल निकासका लागि उत्साहजनक भएको भनाइ नेता महरको छ।

यस्तै, नेपाल शिक्षक सङ्घका सुदूरपश्चिम सभापति डिल्लीराज पन्तले सभापति देउवासँगको छलफल निकै उत्साहजनक रहेको दाबी गरे। सभापति देउवाले गृहमन्त्री रमेश लेखक, अर्थमन्त्री विष्णु पौडेल र शिक्षामन्त्री विद्या भट्टराईलाई फोन गरेर शिक्षकका माग सम्बोधनमा गम्भीर हुन र निर्णायक छलफल गर्न ध्यानाकर्षण गराएको जानकारी पनि पन्तले दिए।

प्रकाशित मिति: शुक्रबार, चैत २९, २०८१ १२:०७