विद्यालय शिक्षा विधेयक एक दुई दिनमा टुंगो नलागे आन्दोलन गर्ने महासंघकाे चेतावनी

शिक्षक

गृहपृष्ठ
शिक्षक

विद्यालय शिक्षा विधेयक एक दुई दिनमा टुंगो नलागे आन्दोलन गर्ने महासंघकाे चेतावनी

ईडीयू सवाल शुक्रबार, असार २०, २०८२

काठमाडाैँ - नेपाल शिक्षक महासंघका अध्यक्ष लक्ष्मीकिशोर सुवेदीले विद्यालय शिक्षा विधेयक एकदुई दिनमा वार कि पार हुने र टुंगो नलागे आन्दोलनमा जाने बताएका छन्। प्रतिनिधिसभाको शिक्षा, स्वास्थ्य तथा सूचना प्रविधि समितिमा विद्यालय शिक्षा विधेयक रोकेर सरकार र शिक्षक महासंघबीच वार्ता चलिरहेको छ।

अस्थायी प्रकृतिका शिक्षकको मागमा शिक्षक महासंघले असन्तुष्टि जनाएपछि गत १६ असारमा अन्तिम समयमा समितिबाट विधेयक पास हुन सकेको थिएन।नमिलेका विषयमा शिक्षा, विज्ञान तथा प्रविधि मन्त्रालयसँग वार्ता भइरहेको शिक्षक महासंघले जनाएको छ।

‘टुंगोमा पुगिसकेको छैन। छलफल गरिरहेका छौँ। अस्थायी शिक्षकका मागको सवाल र स्थायी शिक्षकको बढुवाको कुरा हो,’ महासंघ अध्यक्ष लक्ष्मीकिशोर सुवेदीले भने ‘एक दुई दिनमा वार कि पार हुन्छ। टुंगो लाग्यो भने लाग्यो नभए आन्दोलनमा जान्छौँ,’।

राहत शिक्षक, अनुदान कोटा, विशेष शिक्षा तथा प्राविधिक धारका शिक्षक, प्रशिक्षक अनुदान कोटामा कार्यरत शिक्षक, कक्षा ११ र १२ को स्वीकृत दरबन्दीमा कार्यरत अस्थायी शिक्षकको पदपूर्ति आन्तरिक ७५ प्रतिशत र खुला २५ प्रतिशत हुनुपर्ने महासंघको माग छ। तर समितिमा आन्तरिक ६० प्रतिशत र खुला ४० प्रतिशत गर्ने सहमति जुटेको छ। तर यसमा महासंघले विरोध जनाएपछि विधेयक पास हुन सकेको छैन। त्यसैगरी शिक्षकको बढुवाको विषयमा पनि कुरा मिलेको छैन।

शिक्षक बढुवामा कार्य सम्पादन मूल्यांकनका लागि तोकिएको अंकको विषय पेचिलो बनेको हो। उपसमितिले पछिल्लो पाँच वर्षको कार्यसम्पादन मूल्यांकनमा औसतमा ९० प्रतिशत अंक प्राप्त गर्नुपर्ने सहमति गरेको छ। ९० अंक घटाउनु पर्ने माग महासंघको छ।ईसीडीमा कार्यरतलाई पनि शिक्षक वा सहजकर्ता भन्नेमा सहमति जुटेको छैन। यिनै नमिलेको विषयमा सरकारसँग वार्ता भइरहेको महासंघले जनाएको छ।

सरकारले संसद् बैठक २३ असारका लागि बोलाएको छ। सो अवधिसम्म कुर्ने महासंघको योजना छ। गत २० चैतदेखि २९ दिन लामो काठमाडौँमा शिक्षकहरूले आन्दोलन गरेका थिए। १७ वैशाखमा १५ असारभित्र ऐन जारी गर्ने सहमति भएपछि आन्दोलन स्थगित गरिएको थियो।

प्रकाशित मिति: शुक्रबार, असार २०, २०८२ १२:२९