बर्दिबासकाे मनरासिसवा नगरपालिकाद्वारा आन्दोलन गर्ने शिक्षकको तलब कट्टा गर्ने चेतावनी

समाचार

गृहपृष्ठ
समाचार

बर्दिबासकाे मनरासिसवा नगरपालिकाद्वारा आन्दोलन गर्ने शिक्षकको तलब कट्टा गर्ने चेतावनी

ईडीयू सवाल आइतबार, भदौ १५, २०८२

काठमाडाैँ - आन्दोलनको नाममा धर्ना हडताल गर्ने र विद्यालयको पठनपाठनमा बाधा पुर्‍याउने शिक्षकमाथि बर्दिबासकाे मनरासिसवा नगरपालिकाले कारबाहीको चेतावनी दिएको छ। नगर प्रमुख मोहन पाण्डेयले विद्यालयमा हाजिरी गरी आन्दोलनमा सहभागी हुने शिक्षकहरूको तलब कट्टा गर्ने चेतावनी दिएका हुन्।

नेपाल शिक्षक महासंघमा आबद्ध सामुदायिक विद्यालयका शिक्षकहरूले शुक्रबार विद्यालयमा हाजिरी लगत्तै नगर कार्यालयको परिसरमा धर्ना बसेपछि नगर प्रमुख पाण्डेयले यस्तो चेतावनी दिएका हुन्।

उनले विद्यालयमा आएर हाजिरी गर्ने तर कक्षामा नपढाई आन्दोलनमा सहभागी हुने कार्यलाई विद्यार्थीको भविष्यसँग खेलबाड भएको टिप्पणी गर्दै त्यस्ता शिक्षकको हाजिरी रोक्का गरी तलबसमेत कट्टा गरिने बताए। उनले भने, ‘हाजिरी गरेपछि विद्यालयमा पढाउनै पर्छ। आन्दोलनमा जाने हो भने बिदा लिनु पर्छ। अन्यथा गयल गरी तलब कट्टा गरिने छ ।’ तथापि आन्दोलनरत शिक्षकहरूसँग वार्ता र समाधानको बाटो भने खुला रहेको पनि पाण्डेले बताए।

नगर प्रमुखको चेतावनी प्रति आन्दोलनरत शिक्षकले भने संयमित प्रतिक्रिया दिएका छन्। दुर्गा मावि मनराका प्रध्यानाध्यापक तथा शिक्षक मञ्चका राष्ट्रिय अध्यक्ष कुमुद सिंहले राष्ट्रिय शिक्षक महासंघको आह्वान सुरु भएको यो आन्दोलन केन्द्रीय सेड्युल अनुसार अघि बढने बताए।

प्रध्यानाध्यापक सिंहले भने, ‘नगर प्रमुखको भनाइप्रति हाम्रो कुनै आपत्ति छैन। आन्दोलन र बिदाबारे नगरपालिकासँग सहमतिमा अघि बढन सकिन्छ। यसअघिको १४ दिने आन्दोनमा पनि नगर प्रमुखको सहमतिमै वर्षे बिदाबाट पठनपाठन मिलाइएको थियो। अहिले पनि हामीसँग ५० दिन बिदा बाँकी छ।’

शिक्षकले सुरु गरेको धर्ना आन्दोलनले नगर क्षेत्रका २७ सामुदायिक विधालयका १३ हजार सात सय विद्यार्थीको पठनपाठनमा बाधा पुग्ने भएपछि नगरपालिका गम्भीर भएको जनाइएको छ। मनरा सिसवा नपामा २५० सामुदायिक शिक्षक कार्यरत छन्।

प्रकाशित मिति: आइतबार, भदौ १५, २०८२ १०:५६