मनोहरामा बढ्यो बाढीको जोखिम, गृहमन्त्री गुरुङ अनुगमनमा

समाचार

गृहपृष्ठ
समाचार

मनोहरामा बढ्यो बाढीको जोखिम, गृहमन्त्री गुरुङ अनुगमनमा

ईडीयू सवाल शुक्रबार, असोज ९, २०८३

काठमाडौँ- निरन्तरको वर्षाका कारण मनोहरा खोलामा बाढीको बहाव बढेपछि गृहमन्त्री सुधन गुरुङ स्थलगत अनुगमनमा निस्किएका छन्।

गृहमन्त्री गुरुङ केहीबेरअघि च्यासल क्षेत्रमा पुगेर मनोहरा खोलामा बढेको बाढीको अवस्था र सम्भावित जोखिमबारे स्थलगत निरीक्षण गरेका हुन्।

गृहमन्त्री गुरुङको सचिवालयका अनुसार उनी नेकपा एमालेको केन्द्रीय कार्यालय नजिकै रहेको मनोहरा खोला क्षेत्रको अवस्थाबारे जानकारी लिन त्यहाँ पुगेका हुन्।

लगातारको वर्षाका कारण काठमाडौं उपत्यकाका विभिन्न नदी तथा खोलामा पानीको सतह बढिरहेको छ। कतिपय नदी तथा खोलाको बहाव बढेसँगै तटीय क्षेत्रमा जोखिमसमेत बढेको छ।

सम्भावित जोखिमलाई ध्यानमा राख्दै सरकारी निकायहरूले नदी तथा खोला आसपासका बासिन्दालाई सतर्क रहन आग्रह गरेका छन्।

विशेषगरी नदी तथा खोलाको किनार, डुबान हुनसक्ने क्षेत्र र कमजोर संरचना भएका स्थानमा अनावश्यक आवतजावत नगर्न सम्बन्धित निकायले आग्रह गरेका छन्।

वर्षा जारी रहेकाले मनोहरा खोलासहित काठमाडौं उपत्यकाका अन्य नदी तथा खोलाको जलसतह थप बढ्न सक्ने भन्दै जोखिम क्षेत्रमा रहेका नागरिकलाई उच्च सतर्कता अपनाउन आग्रह गरिएको छ।

प्रकाशित मिति: शुक्रबार, असोज ९, २०८३ १६:३५