काठमाडौँ- भारतीय शैक्षिक संस्थाबाट जारी भएको नक्कली शैक्षिक योग्यताको प्रमाणपत्र पेस गरी शिक्षक नियुक्ति लिएको आरोपमा अख्तियार दुरुपयोग अनुसन्धान आयोगले एक शिक्षकविरुद्ध विशेष अदालतमा आरोपपत्र दायर गरेको छ।
आयोगका अनुसार मोरङको ग्रामथान गाउँपालिका–५ स्थित आदर्श निकेतन आधारभूत विद्यालयमा कार्यरत निम्न माध्यमिक तहका राहत गणित शिक्षक सुरेन्द्रकुमार विश्वास थारूविरुद्ध आरोपपत्र दायर गरिएको हो।
शिक्षक विश्वास थारूले नियुक्ति लिने क्रममा भारतको बिहार स्कुल एक्जामिनेसन बोर्ड (BIHAR SCHOOL EXAMINATION BOARD) बाट जारी भएको भनिएको आईएस्सी (Intermediate Level) तहको शैक्षिक योग्यताको प्रमाणपत्र पेस गरेको उजुरी आयोगमा परेको थियो।
उक्त उजुरीका आधारमा अनुसन्धान गर्दा उनले २०६३ असार १५ गतेदेखि निम्न माध्यमिक तह गणित विषयको राहत शिक्षक पदमा नियुक्ति पाउन नक्कली शैक्षिक योग्यताको प्रमाणपत्र पेस गरेको देखिएको आयोगले जनाएको छ।
आयोगका अनुसार भारतीय बोर्डबाट जारी भएको भनिएको उक्त प्रमाणपत्र झुट्टा तथा नक्कली रहेको अनुसन्धानबाट खुलेको छ। सोही प्रमाणपत्रका आधारमा राष्ट्रसेवकको ओहदा प्राप्त गरेको देखिएकाले उनीमाथि कानुनी कारबाही अघि बढाइएको हो।
आयोगले शिक्षक विश्वास थारूले भ्रष्टाचार निवारण ऐन, २०५९ को दफा १६ को उपदफा (१) बमोजिमको कसुर गरेको ठहर गर्दै सोही कानुनी व्यवस्थाअनुसार सजायको मागदाबी लिएको छ।
आयोगले २०८३ कात्तिक २७ गते विशेष अदालत, काठमाडौंमा उनीविरुद्ध आरोपपत्र दायर गरेको प्रेस विज्ञप्तिमार्फत जनाएको छ।
नक्कली शैक्षिक प्रमाणपत्रका आधारमा सार्वजनिक पद प्राप्त गर्ने तथा जिम्मेवारी निर्वाह गर्ने कार्यलाई भ्रष्टाचारजन्य कसुर मान्दै आयोगले सम्बन्धित व्यक्तिमाथि कानुनी प्रक्रिया अघि बढाएको हो।
यस मुद्दामा विशेष अदालतको अन्तिम फैसला आउन बाँकी छ।
-1794540031-1794558875.png)
