८५ औं जन्मोत्सवमा ‘स्वरसम्राट नारायणगोपाल’ पुस्तकको आवरण सार्वजनिक

कला/साहित्य

गृहपृष्ठ
कला/साहित्य

८५ औं जन्मोत्सवमा ‘स्वरसम्राट नारायणगोपाल’ पुस्तकको आवरण सार्वजनिक

ईडीयू सवाल शुक्रबार, असोज १८, २०८१

काठमाडौँ - स्वरसम्राट नारायणगोपालको ८५ औं जन्मोत्सव असोज १८ को अवसरमा उनका डायरी, संस्मरण र चिठीहरुको पुस्तक ‘स्वरसम्राट नारायणगोपाल डायरी, संस्मरण र प्रेमपत्र’को आवरण सार्वजनिक गरिएको छ। बुकहिल पब्लिकेसनले आगामी मङ्सिर १९ गते नारायणगोपाल स्मृति दिवसको दिन उक्त पुस्तक सार्वजनिक गर्ने जनाएको छ।

नारायणगोपाल सङ्गीत कोषका कार्यवाहक अध्यक्ष दीपक केसीले केही समयअघि नारायणगोपालकै निवासमा १४ वटा डायरी र चिठीहरू प्राप्त गरेपछि कोषले तिनलाई पुस्तकको रूपमा सार्वजनिक गर्ने निर्णय गरेको थियो।

‘नारायणगोपालका जीवनका रोचक र अति मार्मिक पाटाहरूलाई यो पुस्तकले पाठकसामु ल्याउनेछ र उहाँबारे व्याप्त भ्रमलाई चिर्नेछ’ प्रकाशक बुकहिलले भनेका छन्, ‘यो ऐतिहासिक दस्तावेजसहितको पुस्तक भएकाले नेपाली सङ्गीतको विकासक्रम अध्ययनका निम्ति पनि फलदायी हुनेछ।’

करिब ५०० पृष्ठ रहने पुस्तकमा नारायणगोपाल र उनीसँग सम्बन्धित अप्रकाशित तस्वीरहरू समेत रहनेछन्। पुस्तक पेपर ब्याक र हार्ड ब्याक छुट्टाछुट्टै कलेवरमा प्रकाशन हुनेछ।

प्रकाशित मिति: शुक्रबार, असोज १८, २०८१ १७:२०